"Defendendo a Independencia de Timor-Leste"

"Defendendo a Independencia de Timor-Leste"

segunda-feira, 11 de junho de 2007

Komunikadu Imprensa - Opozisaun lakon reputasaun kona ba nia pozisaun ba paz, lei no ordem

Vota ba FRETILIN!
Eleisaun Parlamentario 2007

"Defende independensia Timor-Leste nian"

Komunikadu inprensa
10 Junu 2007

Opozisaun lakon reputasaun kona ba nia pozisaun ba paz, lei no ordem

"Lider CNRT nian fo sala fali ba FRETILIN konabá akontesimentu tiru
ema mate, nebe mosu iha semana liu ba iha distritu Viqueque no dehan
katak ida ne'e hahalok politika violénsia nian. Akusasaun falsu ne'e
kontra FRETILIN serve deit ba hatún CNRT nia reputasaun konaba ba
paz, lei no ordem nian." tenik Francisco Lu Olo Guterres, ohin.

"CNRT nia proposta atual konaba lei no ordem kopia deit husi hahalok
Governu FRETILIN nian – ami iha orgullu ba ami nia hahalok sira ne'e
- nebé asegura katak Inspetor Jeral no Provedór nebé Independente
duni mak tenke tau matan no kontrola konaba korupsaun; Parlamentu atu
asegura Governu halao ninia knar hó responsabilidade; Judisiáriu iha
kbiít atu tau matan ba justisa nebé lai's no justu; reforma hikas
fila fali instituisaun Polísia (PNTL) no instituisaun Militar (F-FDTL)
atu sai instituisaun seguransa nian ké profisional no la uza hodi
halo politka", dehan Lo Olo.

"Lider CNRT nian halo alegasaun ida nebe salah bainhira dún Governu
FRETILIN mak organiza ka mak fo "lisensa" ba Polisia no Militar sira
atu luta kontra malu iha tinan kotuk liu ba, no lori ita nia nasaun
joven ne'e lao fali ba kotuk," tenik Lu Olo.

"Lider CNRT nian mos tenki hola responsabilidade tamba hatama eis
komandante polisia nasional Sr. Paulo Martins nia naran iha lista
kandidatura partidu CNRT nian ba Parlamementu Nasional; relatóriu
komisaun Inkéritu independente Nasoens Unidas nian tinan kotuk fo sai
katak Sr. Paulo Martins, la iha no la hetan autorizasaun atu fahe
kilat ba ninia Adjuntu Komandante Sr. Abilio Mesquita, nebe tuir mai
sai hanesan dirijente ba grupu ida hodi ataka Sr. Brigadeiru Jeneral
Taur Matan Ruak nia uma, iha loron 24 Maiu 2006" , tenik tan Lo Olo.

Tuir relatorio' UN ne'e nian iha pagina 41 hateten katak:

Kamandante Jeral PNTL nian hasai kilat sira husi Armazén nasional PNTL
nian, maibé, la fo' hatene ba ofisiais sira nebe servisu iha fatin
armazen nian. Iha loron 23 Marsu, kilat 60 marka Steyr no bala musan
kaixa 50 haruka ba URP iha akampamentu Aileu. Iha loron 15 April,
kilat 10 marka Steyr no bala musan balun haruka ba estasaun Polisia
iha distritu Liquiçá. Hafoin insidente nebe akontese iha 25 Maio, Nia
(Komandante geral PNTL) fo ordem ba lori kilat 10 marka Steyr ho
bala musan balun ba tau iha armazén estasaun Polísia nian iha Gleno.
Komisaun ne'e preokupa mós katak sira hili deit polísia husi parte
loru monu nian mak simu kilat no halo parte ba grupu nebé Komandante
Adjuntu Abílio Mesquita, nebé fó treinamentu ba polísia nain 10 husi
"Ekipa ho Misaun Espesial" Distritu Dili nian, iha loron 11 de Maiu.
Tuir mai, ofisiais PNTL sira hotu nebé tuir treinamentu ne'e hela iha
ninia komandu nia okos no kaer kilat Steyr. Tuir mai tan Komandante
adjuntu Abilio Mesquita fo kilat marka Steyr ba Ofisiais PNTL nain 20
husi parte Loro monu nian, iha loron 17 Maio, no tuir mai sira hotu
hetan ordem diretamente husi nia. Treinamentus sira ne'e hotu no fahe
kilat sira ne'e hotu ba iha Ofisiais PNTL parte Loromonu nian halao
ho autorizasaun husi Komandante Geral PNTL nian. (tradusaun livre
hosi lian inglés).

"Kilat sira ne'e hotu fahe husi Sr. Paulo Martins no uza atu hodi
hatun ou hasai tiha Governu FRETILIN nebé eleitu, ema sira ne'e mak
organisa, maibe, agora dadaun lider CNRT nian du'un fali katak
FRETILIN mak responsabilisa ba violénsia ne'e".

"Problema hanesan ida dehan iha leten ne'e mos mosu dala ida tan ho
lider CNRT nian, relasiona ho kazu Rai'los no nia grupu nebé iha
kilat. Komisaun Inkéritu Independente UN nian mos hateten katak
Rai'los mos tenke hetan akuzasaun no tenki lori nia ba iha tribunal,
maibé, buat sira ne'e seidauk akontese to'o ohin loron.

Lider CNRT nian mos tenki hola responsabilidade ba asuntu ida ne'e
tamba ohin loron Rai'los sai fali koordenador kampanha partidu CNRT
nian iha distritu Liquiçá.
"Ema nebé koalia ho ulun rua tenke ramata ," tenik Lu Olo.

"Lider CNRT nian hatene momós katak wainhira komisaun Inqueritu
independente UN nian husu ba halo investigasaun klean liu ba kazu
ei's Primeiru Ministru nian konaba kasu fahe kilat, investigasaun
halao hela iha Prokuradoria Jeral; investigasaun ne'e klean no naruk
no fo konkluzaun katak la iha kasu atu ba hatan," Sr. Lu Olo hatutan.
"Tamba sa mak nia kontinua koalia kona ba relatóriu UN nian maibé, la
koalia konaba rezultadu investigasaun nian?"

"Iha eleisaun ba Parlamentu ida ne'e, buat nebe a'as liu no diak liu
mak konaba paz, no seguransa no hasai tiha ita nia ema hosi moris iha
kiak nia laran.

FRETILIN sai vitima ba violénsia iha tinan ida ho balun nia laran no
la'os FRETILIN mak autor ba violénsia ne'e. Ami husu ba maluk Timor
oan sira atu vota ba FRETILIN nia kandidatus sira iha loron 30 Junho
tamba Governu FRETILIN sei halao buat sira hanesan tuir mai ne'e:

• Hapara ema sira nebe halo violénsia,
• Kontinua ho hahalok nebe diak hodi luta hasoru korupsaun ,
• Hadia' no hasae' diak liu tan kapasidade Judisial,
• Hari'i hika's fila fali Instituisaun Polisia no Militar nian atu
bele sai profesional duni, no
• Hadia liu tan program dezemvolvimentu ekonómiku atu hetan GDP nebe
sae to'o 7% iha tinan-tinan , bazeia ba jestaun Fundu Mina Rai nebé
diak. "

"FRETILIN sadik partidu opozisaun sira atu hatudu to'ok ba públiku
konaba proposta programa sira nian nebe detalhadu duke koalia la klaru
no uza slogans nebé la iha importánsia", dehan Lu Olo.

Atu hetan Informasaun barak liu tan , favor kontatu:

Jose Teixeira +670 7287080
Madia FRETILIN nian +670 7335060, ou email fretilin.media@gmail.com
www.timortruth.com, www.fretilin-rdtl.blogspot.com

Sem comentários: