Komunikadu Imprensa - FRETILIN defende jestaun fundu públiku ho responsabilidadi

Vota ba FRETILIN!
Eleisaun Parlamentár 2007

"Defende Ukun Rasik An Timor-Leste Nian"

Komunikadu de Imprensa
10 Juñu 2007

FRETILIN defende jestaun fundu públiku ho responsabilidadi

FRETILIN, Partidu maioritáriu Timor-Leste nian, dehan sira sei
kontinua halao jestaun ida ke iha responsibilidade ba fundus estadu
nian no kritika partidu opozisaun tamba buat nebé sira promete bele
halo Timor-Leste hetan bankarrota (gasta osan to'o hotu). Partidu
FRETILIN fo sai mesagem ne'e durante diálogu iha distritu Aileu,
Manufahi, Ainaro, Covalima no Bobonaro husi loron 3 fulan Juñu to'o
loron 8 fulan Juñu.

Diálogu hirak ne'e Presidente Fransisco Guterres Lu Olo no Sekretáriu
Jeral Mari Alkatiri maka lidera hamutuk ho ministru/a sira no mos
lideres FRETILIN sira seluk.
Dr Alkatiri dehan, "Iha tinan lima nia laran ami harii sistema legal
no institusaun estadu nian hodi halo jestaun ba fundu estadu ho
responsabilidade, kontrola metin despezas estadu nian, no lakoi halo
tusan hó Banku Mundial."

"Ami foti medidas hirak ne'e tamba ami hakarak kontrola ekonomia
Timor-Leste nian ba fó mos benefisiu ba jerasaun aban bai rua nian."

Alkatiri haktuir, "Partidu opozisaun sira halo promesas bar-barak,
maibé, la hanoin ba konsekuénsia ba ekonomia iha Timor-Leste laran.
Ezemplu ida mak sira promete atu harii banku iha suku ida-idak
hamutuk atus haat, haat nulu resin rua (442), ida fali mak hadia dalan
hotu-htou iha tinan lima (5) nia laran, ida fali mak hasai osan husi
Fundu Mina Rai ba fahe. Promesa hirak nee hatudu la iha vizaun klaru
atu dezenvolve ita nia rain."

"Ami analiza tiha ona sira nia promesa no kalkula ona tuir sira nia
promesa. Ami haré katak sei sira implementa duni sira nia promesa,
bele dehan katak Fundu Mina Rai, Fundu nebé governu FRETILIN maka
servisu makaas hodi estabelese, bele sai mamuk ka bankarrota, la tó
tinan haat (4) nia laran. Sei ida nee akontese duni, Timor-Leste tenke
halo tusan ho rai sira seluk no instituisoens estranjeiru, halo ita
sai devedór. To'o agora governu FRETILIN sidauk deve osan husi rai
seluk."

"Rai bar'barak se selu sira nia túsan, liu tiha dékadas barak (liu
tinan sanulu ka ruanulu, ka tolu nulu) depois de sira hetan
independénsia. Sei Timor-Leste tuir dalan hanesan rai seluk sira ne'e,
ita nia be oan doben sira mos sei la konsege selu hotu ita nia tusan.
Se ita halo tusan, ita bele dehan katak Timor-oan sei la iha kontrolu
ba ekonomia rai laran nian no Timor-oan la iha liberdade atu gasta
osan ba dezenvolve áreas importantes hanesan saúde, edukasaun no
agrikultura," dehan Alkatiri.

Lu Olo hatete, "Esforsu nebé governu FRETILIN halo fó garantia ba
dezenvolvimentu nebé úniku no iha estabilidade, ida nebé ke asegura
Timor-oan iha kontrolu. Só governu FRETILIN mak bele halo ida nee
tamba sira maka iha esperiénsia no dedikasaun ba povu Timor-Leste."

Lu Olo dehan, "Ita nia kampaña tenke foka liu ba programa polítiku
ida-idak nian, no ami sadik partidu sira seluk ba halo debate kona ba
dezenvolvimentu ekonómiku."

Atu hetan tan informasaun, favór kontakta:

Jose Teixeira (+670) 728 7080
FRETILIN media ho fretilin.media@gmail.com

www.timortruth.com, www.fretilin-rdtl.blogspot.com