Komunikadu Imprensa - Kampanha alfabetizasaun no servisu saúde básika importante tebe-tebes ba feto sira

Vota ba FRETILIN!
Eleisaun Parlamentár 2007

"Defende indpendensia Timor-Leste nian"

Komunikadu de Imprensa
24 Juñu 2007

Kampanha alfabetizasaun no servisu saúde básika importante tebe-tebes ba feto sira

Tuir FRETILIN nia kandidatu ba deputada no Vise Ministra ba Edukasaun
no Kultura, Ilda da Conceição, kampanha ba promove alfabetizasaun no
saúde bázika iha Timor –Leste sai knaar importante ba governu
FRETILIN hodi aumenta feto sira nia partisipasaun iha vida ekonómika,
sosial no politika iha ita nia rain nian.

Sra. da Conceição, ne'ebé hori-uluk funu nain no tau matan ba
Organizasaun Feto Timor-Leste (OPMT) haktuir: "Tamba nee mak FRETILIN
sei hatama iha orsamentu, bolsas estudu no fo subsídio ba ajuda
feto sira no feto foin sae sira atu kompleta sira nia edukasaun, hosi
eskola primária to'o edukasaun tersiária, hanesan universidade."

"Kampanha Alfabetizasaun hakarak fó benefísiu ba grupu tolu, ida mak
feto sira. Feto sira sei partisipa iha Kampanha ne'e núdar alunu no
monitor. Ita hatene katak bainhira feto sira hatene le no hakerek sira
fiar sia nia a'an liu tan no sei la tauk fó sai sira nia hanoin ho
hakarak iha vida politika no ekonómika. Bainhira feto sira hatene le
no hakerek, labarik sira sei la mate barak no saúde feto sira nian no
labarik sira nian sei diak liu tan."

Sra da Conceição dehan governu FRETILIN maka iha fokus ba servisu
saude basiku hodi hasai saude inan no labarik nian no hadia praktikas
ba saude sexual.
"Feto timor sira hahoris oan barak liu iha mundu tomak - inan ida
hahoris oan ualo; iha feto nain 10.000, feto 42 to'o 80 mak mate
bainhira hahoris labarik. Sei ita kombina servisu saúde báziku ho
edukasaun , ita bele hatún númerus hirak ne'e."

Nia rekoñese katak FRETILIN tenke halo buat barak tan atu promove
direitu feto sira nian.

"Opozisaun balu kritika FRETILIN tamba sei dauk iha lejislasaun kona
ba violénsia doméstika. Maibé, ami prepara dadauk lejislasaun ba
inklui kódigu penal foun, ne'e prosesu ida ké naruk no difísil.
Timor-Leste sei dauk hadia didiak sektor justisa, ne'e duni, sei dauk
bele tau matan didiak ba violénsia doméstika .

"FRETILIN hatene liu partidu sira seluk katak feto sira maka sai
vitima funu nian no violénsia kontra feto sei hatutan ba be'beik
bainhira konflitu hotu.

"FRETILIN hahú iha 1974 promove igualdade direitu feto no mane nian.
Partidu FRETILIN mak halo uluk movimentu ba promosaun direitu feto
nian iha Timor-Leste no harii uluk liu organizasaun feto nian,
Organizasaun Popular da Mulher Timor (OPMT) iha tinan 1975.
Organizasaun nee maka dala uluk feto nian," nia dehan. "FRETILIN
promove direitu feto nian durante resisténsia no halao nafatin knaar
ne'e to ohin loron. Governu FRETILIN hari unidade ba ema vulnerável
iha PNTL no unidade ne'e mak servisu atu kombate krime kontra feto no
labarik."

"Ita hotu tenke halo esforsu liu tan atu muda atitude komunidade nian.
Mane sira mos tenke servisu hamutuk ho feto sira ba ida ne'e. Ami husu
partidu politiku hotu-hotu ba halo kampanha hasoru violénsia
doméstika. Ita tenke ezije liu hosi ita nia lideres politikus, ne'ebé
tenke fo exemplu diak."

Ba hetan tan informasaun, bele kontatu:

Ilda da Conceição (+670) 723 0033
www.fretilin-rdtl.blogspot.com, www.timortruth.com