Komunikadu Imprensa - Ho FRETILIN feto sira nia partisipasaun polítika aumenta ba bei'beik

Vota ba FRETILIN!
Eleisaun Parlamentár 2007

"Defende indpendensia Timor-Leste nian"

Komunikadu de Imprensa
24 Junu 2007

Ho FRETILIN feto sira nia partisipasaun polítika aumenta ba bei'beik

Governu FRETILIN hakat difikuldades bo'ot tebes hodi aumenta feto
timor oan sira nia partisipasaun iha vida politika.

"Feto timor oan ninia nível edukasaun badak , maibé, reprezentasaun
feto timor nian iha Parlamentu a'as liu rai barak nian," dehan Ana
Pessoa, Ministra Administrasaun Estatal no kandidatu ba deputada iha
lista FRETILIN nian.

"FRETILIN mak exize ba inklui kondisaun espesífika iha Konstituisaun
hodi garante igualdade jéneru katak mane ho feto iha direitu hanesan,"
Pessoa hatete.
Sra. Pessoa hatete, "Hosi kedas 2002 mak Governu FRETILIN halao
servisu ba harii sistema lejislativu ida ké haktuir ezijénsia iha
Konstituisaun kona ba igualdade."

Sra Pessoa, horiuluk servisu hanesan juiz provinsial iha Moçambique no
iha experiénsia barak núdar jurista ba lei sivil. Nia iha experiénsia
makás kona ba asuntus legais direitu feto no labarik nian no fó
kontribuisaun barak ba ekipa nebé hakerek Konstituisaun Timor-Leste
nian.

"FRETILIN mak exize katak feto sira tenke iha reprezentasan makás,
ne'e duni, iha lista FRETILIN nian, feto sira iha reprezentasaun 27%
iha Asembleia Konstituinte no primeiru Parlamentu Nasional. Tamba
ne'e, feto sira ninia partisipasaun iha Parlamentu Timor-Leste nian,
a'as liu rai barak nian, liu mo'os rai balu ké dezenvolvidu liu
Timor-Leste. Iha eleisaun tuir mai, FRETILIN iha kandidatu feto
hamutuk 22, liu minimu 16, ne'ebé lei ezije ba total 65 kadeiras".

"Hau nia Ministériu mak halo lei eleitoral no ezije ba partidu
ida-idak katak iha grupu kandidatus hat-hat, kandidatu ida tenke
feto. Karik Partidu FRETILIN manan, ami sei servisu atu aumenta liu
tan partisipasaun feto nian. Hau nia Ministériu mak ezije iha
lejislasaun ba administrasaun sukus nian katak konsellu suku ida-idak
tenke iha feto rua no feto klosan ida.

Sra. Pessoa dehan FRETILIN mos promove feto ba okupa pozisaun senior
iha governu.

"Oras nee feto sira hetan posizaun a'as iha Konsellu de Ministrus,
hanesan Ministra no Vise Ministra Planu no Finansas, Ministra no Vise
Ministra ba Edukasaun no Kultura, Vise Ministra Negósius Estranjeirus
no Kooperasaun, Ministra Obras Públikas, no hau rasik, Ministra
Administrasaun Estatal.

"Ami mos nomeia feto ba pozisaun senior iha funsionalismu públiku.
Ezemplu ida mak Sekretária Permanente Ministériu Agrikultura Florestas
no Peskas nian. Ami harii ona Gabinete Promosaun Igualdade Jéneru iha
Gabinete Primeiru Ministru no Ministeriu ida-idak iha reprezentante
ida ba asuntus jéneru nian. Nee mak ezemplu balu ne'ebé hatudu katak
governu FRETILIN hakás a'an duni atu dezenvolve sosiedade modernu
ne'ebé feto sira iha direitu hanesan mane sira no hetan respeitu.

"Hau fiar katak FRETILIN bele tanen nafatin direitu feto sira nian
hanesan prioridade bo'ot tamba estruturas partidu nian, Komisaun
Polítika Nasional quazi 50% membrus mak feto no Komité Sentral, quazi
30% membrus mak feto. Komisaun no Komité mak órgaun FRETILIN nian
ne'ebé iha nivel a'as liu ba foti desizaun partidu nian.

Pessoa haktuir, "Medidas legais no administrativas sira ne'e halo
parte prosesu ba hadia situasaun feto sira nian. Iha rai ida ke nível
edukasaun badak, nebé 52% feto sira la hatene le no hakerek, buat sira
ne'e hotu harii difikuldades ba feto sira nia partisipasaun iha vida
ekonómika, sosial no politika iha ita nia nasaun laran".

Ba hetan tan informasaun, favour kontatu:

Ana Pessoa (+670) 728 7080 ka haruka email ba fretilin.media@gmail.com
www.timortruth.com, www.fretilin-rdtl.blogspot.com