Komunikadu Imprensa - FRETILIN kondena violensia iha distritu Ermera, ezije asaun hosi Polisia ONU

Vota ba FRETILIN!
Eleisaun Parlamentár 2007

"Defende Ukun Rasik An Timor-Leste Nian"

Komunikadu de Imprensa
14 Juñu 2007

FRETILIN kondena violensia iha distritu Ermera, ezije asaun hosi Polisia ONU

FRETILIN ohin eziji ba Polisia ONU atu foti kedas asaun atu hapara
violensia no intimidasaun nebé ema halo ba membrus FRETILIN nian iha
distritu Ermera ne'ebé halo ema nain 140 mak halai mai Dili.

Francisco Soares, membru Parlamentu hateten "Refujiadu hamutuk nain 80
to'o iha Dili horseik no ba hela iha kampu refujiadu iha Campo Alor no
ema nain 60 ba hela iha kampo refujiadu iha jardim Borja da Costa iha
Dili."

Soares hatutan katak molok sira halai mai Dili sira subar iha
plantasaun kafé iha distritu Ermera wainhira tamba ema halo tauk sira
no estraga sira nia uma iha suku Lisapat no Urahu iha distritu
Ermera.

Soares hatutan, "Grupu seluk ne'ebé halai ba hela iha administrasaun
distritital Gleno nian sei mai Dili mos."

Soares mos ezije ba Polisia ONU atu investiga keixa ható ba
Parlamentu nebé alega katak Partidu Demokrátiku nia ema dadur membru
FRETILIN iha sira nia uma loron tolu nia laran, iha suku Potete.

"Fretilin nia ema nebé konsegue halai sai husi detensaun ne'e hatutan
katak membrus oposizaun nian ezije sira atu fo lista membrus
FRETILIN nian, iha distritu Ermera."

Soares ezije Polisia ONU nian atu foti kedas asaun atu hapara
violensia no intimidasaun iha distritu Ermera no hala'o investigasaun
lolós no independente kona ba violensia no intimidasaun hirak ne'e.

"Ami la iha liberdade atu halao kampaña iha distritu Ermera ba
eleisaun parlamentar 30 Juñu tamba violasaun no intimidasaun."

Soares hatutan, "ida ne'e laos primeira vez mak ami bolu atensaun ba
kondisaun inseguransa iha Ermera no distritu seluk. Ami alerta ona ONU
no ISF kona-ba violensia iha reuniaun alto nivel governu, Parlamentu
no forsa internasional halo, maibe to'o agora, sira la foti asaun
efetiva."

"Polisia ONU no Forsa Internasional ba Estabilizasaun iha ne'e atu
hari fila fali no hametin seguransa no fó garantia ba prosesu
eleisaun sai livre no justu. Sira mos tenke foti medidas nebé presiza
ba hasai kilat husi populasaun distritu Ermera."

"Se Polisia ONU no ISF la konsege kontrola situasaun iha Ermera no
distritu seluk, entaun presiza haré fila fali mekanismu ne'ebé iha
ona no avalia sé iha rezultadu diak ka lae."

"FRETILIN kondena intimidasaun no violensia. Sira ne'ebé involve iha
violensia no intimidasaun tenke ba tribunal hodi ita bele halao
justisa. Buat ida ne'e importante atu nune'e eleisaun bele livre no
justu."

Atu hetan tan informasaun, favór kontakta ho:

Jose Teixeira (+670) 728 7080 (Dili), Francisco Soares (+670) 728 3608 (Dili)
www.timortruth.com, www.fretilin-rdtl.blogspot.com