Komunikadu Imprensa - FRETILIN ejije UNMIT hasai tiha polísia tendensiozu

FRENTE REVOLUCIONÁRIA DO TIMOR-LESTE INDEPENDENTE

FRETILIN

Komunikadu inprensa
9 August 2007

FRETILIN ejije UNMIT hasai tiha polísia tendensiozu

Ohin FRETILIN husu UNMIT atu haruka polísia ida fila fali ba nia rain
iha Filipinas tanba nia hatudu katak nia halo servisu ho tendénsia
kontra FRETILIN. Partidu ne'e mós husu UNMIT atu hato'o karta ida hodi
husu deskulpa kona ba deklarasaun ne'ebé maka membru polísia ne'e
halo.

Vise-prezidente FRETILIN nian no mós membru parlamentu Arsénio Bano
dehan, elementu polísia naran Joel Doria halo deklarasaun ne'ebé laiha
fundamentu kontra FRETILIN hodi alega katak FRETILIN maka organiza
violénsia ne'ebé mosu hafoin anúnsiu inkonstitusionál ba José
Alexandre Gusmão hanesan Primeiru Ministru. Akuzasaun hirak ne'e mosu
iha revista Time ho artigu ida naran "East Timor: Dark Days in Dili",
hosi Rory Callinan iha loron 6 fulan Agostu, tinan 2007 (haree
http://www.time.com/time/printout/0,8816,1650038,00.html).

Bano dehan: "Sr. Doria nia komentáriu ho hahalok sira ne'e mesak
irresponsável de'it. Ami hakarak membru polísia UN nian hala'o sira
nia obrigasaun loloos bainhira kaer sira nia funsaun no mós halo an
hanesan ezemplu ida ba Polísia Nasionál Timor-Leste nian, ne'ebé UN
rasik ajuda hela hodi harii filafali.

"Se Sr. Doria iha evidénsia ruma kona-ba atividade kriminál hirak ne'e
nia tenke bá aprezenta iha evidénsia sira ne'e iha autoridade
prokuradoria nian. Autoridade sira ne'e maka sei trata kazu sira
hanesan ne'e tuir prosesu legál, la'ós uza fali mídia hodi halo
julgamentu. Prosesu ida hanesan ne'e maka FRETILIN sempre apoia.

"Ami ejije UNMIT foti lalais asaun hodi haruka Sr. Doria fila fali ba
nia uma no mós husu ba UNMIT ho Sr. Doria atu husu deskulpa
ofisiálmente ba FRETILIN tanba komentáriu sira ne'ebé Sr. Doria halo.

"Korrupsaun iha forsa polísia Filipinas nian mundu tomak hatene no
polísia Filipina nian la'ós independente polítikamente. Sira iha
reputasaun ba violénsia no violasaun ba direitus humanus. Timor-oan
sira lakohi forsa Filipina nian importa sira nia prátika sira ne'e mai
iha sira nia rain.

"Ami nia pozisaun kona-ba violénsia sempre klaru. FRETILIN la konkorda
ho violénsia iha kualkér forma no sé-sé de'it maka komete aktus krime
nian tenke lori ba hotu justisa."

Atu hetan tan informasaun, favór kontakta ho:

Jose Teixeira (+670) 728 7080, Arsenio Bano (+670) 733 9416, FRETILIN
Media (+670) 733 5060 or ka haruka email ba fretilin.media@gmail.com

www.fretilin-rdtl.blogpsot.com, www.timortruth.com