FRENTE REVOLUCIONÁRIA DO TIMOR-LESTE INDEPENDENTE
FRETILIN
Komunikadu imprensa
Kinta-feira 17 Maiu 2007
Ema halo violénsia no Intimidasaun nafatin hasoru Fretilin
Ema halo nafatin atakes no intimidasaun ba membrus no apoiantes partidu FRETILIN nian, iha fatin oi’oin, hafoin Ramos Horta manan eleisaun ba Prezidente.
Arsénio Bano, membru Komité Sentral FRETILIN nian no mós Komisaun Politika Nasional nian, hatete ohin katak ” hor’ bai ruak (tersa-feira) PD (Partidu Demokrátiku) nia ema ataka no sunu membrus no apoiantes FRETILIN nia uma ha’at no kareta ida, iha bairro Pité-Dili”.
“Polísia Nasoens Unidas nian konfirma ona katak asaun ida ne’e iha motivasaun polítika”, nia dehan
Bano explika, “Bairro Pité la’os FRETILIN nia área. Iha eleisaun prezidensial, sira vota makás ba Ramos Horta.”
“Ami preokupa tebe-tebes tamba apoiantes Ramos Horta nian no membrus partidus opozisaun selebra sira nia kandidatu ninia vitória no halao dadaun violénsia oi’oin hasoru ami nia membrus”.
“Media lokal no internasional lakoi rekonese katak ami nia membrus no apoiantes mak sai nafatin vítimas violénsia nian, hahú kedas ho krize iha 2006”, Bano hatete.
“Ema ataka bei’beilk ami nia membrus hodi hamonu FRETILIN ninia baze de apoiu no hamonu governu FRETILIN nian, ne’ebé harii tuir rezultadu eleisoens demokrátikas”.
Bano mo’os hatutan katak media la tatoli lolós notísia kona ba akontesimentus iha Viqueque tamba la hatete katak membrus no apoiantes FRETILIN nian hetan atakes no intimidasaun iha nebá.
“Ema ataka ami nia membrus iha Dili, Ermera, Liquiçá, Oecusse, Baucau no Viqueque.”
“Nasoens Unidas no ninia polísia tenke halao kedas sira nia servisu hodi fó protesaun ba vítimas violénsia no intimidasaun nian. Ami ezije sira atu halao investigasaun ba akontesimentus hirak ne’e hodi lori responsáveis violénsia no intimidasaun nian ba hasoru justisa.”
Atu hatene ta’an informasaun, dere arame ba:
Arsenio Bano (+670) 733 9416
Jose Teixeira (+670) 728 7080
Sem comentários:
Enviar um comentário