Komunikadu Imprensa: FRETILIN hatete: “Governu AMP la konsege defende estadu”

FRENTE REVOLUCIONÁRIA DO TIMOR-LESTE INDEPENDENTE
FRETILIN

Dili, 24 Janeiru 2008

FRETILIN hatete: “Governu AMP la konsege defende estadu”

FRETILIN, partidu bo’ot liu iha Timor-Leste akuza governu “AMP” la iha responsabilidade
atu defende no reforsa instituisoens estadu ne’ebé importante ba Timor-Leste nudar nasaun
independente.
Iha konferénsia imprensa ne’ebé halao ohin iha Dili, Sekretáriu Jeral FRETILIN nian, Mari Alkatiri
hatete katak iha semana hirak liu ba, ita bele haré katak Governu Xanana Gusmão nian halo sasan barak
ne’ebé hatudu irresponsabiliade no la tuir lei.
“Quazi lor’loron ita haré sira foti dezisaun illegal no inkonstitusional, liu-liu bainhira sira uza osan povu
nian no riku soin povu nian,” dehan Sr. Alkatiri.
“Iha semana kotuk, maske rai ba agrikultura oituan deit, Governu fó hektar rihun ba rihun ba investidor
estranjeiru atu kuda tohek, maibé, la konsulta komunidade lokal no la haré uluk ba planu oinsá atu uza
no dezenvolve rai ba agrikultura.”
Sr. Alkatiri hatete tan: “Prosesu tender la’os transparente. Ministru sira la konsulta diretor sira. Sira la
uza instituisoens ne’ebé ita iha ona, maibé, hari fali task force no sira tuir liu konselleiru estranjeiru nia
hanoin no hakarak.”
Prezidente FRETILIN nian, Sr. Lu Olo, reforsa Sr. Alkatiri nia deklarasaun. “Ita haré momós katak sira
la respeita justisa”, Lu Olo hatete. “Reinado sei iha liberdade nafatin maske nia hetan akuzasaun katak
nia komete krimes graves hasoru Estadu. Forsa seguransa la bele fó seguransa no defende estadu de
direitu tamba instituisaun ida-idak fo orientasaun oi’oin. Deslokadus sira labele fila ba sira nia uma
tamba la iha seguransa”
FRETILIN eziji investigasaun ba kazus administrasaun ne’ebé la tuir dalan lo’os, hanesan duni sai ka
hatún funsionárius nia nível, maibé, la tuir prosesu; hatama ema ne’ebé la tuir kritérius ba servisu; gasta
osan bar-barak hodi fó seguransa ba membrus governu; halo viajen ba tasi balu, maibé, la iha programa
klaru; ataka liberdade imprensa nian no Parlamentu.
“Parlamentu maka instituisaun importante liu ba demokrasia”, Lu Olo hatete. “Governu AMP la trata
Parlamentu ho respeitu, la diskute assuntus didiak, maibé, uza deit maioria hodi pasa tuir sira nia
hakarak; sira la tuir Parlamentu nia regulamentus. Sira aprova orsamentu jeral estadu nian, maibé, la
hatudu momós oinsá sira atu gasta osan povu nian”
Sr. Alkatiri hatete ikus liu: “Iha perigu Timor-Leste atu sai estadu falladu. FRETILIN iha proposta
klaru atu hapara ida ne’e. Ami ható proposta ba Sekretáriu Jeral Nasoens Unidas nian atu ita hari
Komisaun altu nível ne’ebé inkui mo’os FRETILIN atu investiga no rezolve problemas iha áreas
importantes hanesan seguransa, justisa, Reinado no petisionárius, deslokadus, reforma ba
Administrasaun Públika, PNTL no F-FDTL”.

Atu hetan ta’an informasaun, bele kontakta Arsénio Bano, tel. 7339416