"Defendendo a Independencia de Timor-Leste"

"Defendendo a Independencia de Timor-Leste"

segunda-feira, 18 de junho de 2007

Komunikadu Imprensa - FRETILIN la simu interfénsia Australia nian iha eleisaun Timor-Leste nian

Vota ba FRETILIN!
Eleisaun Parlamentár 2007

"Defende independensia Timor-Leste nian"

Komunikadu Inprensa
16 Juñu 2007

FRETILIN la simu interfénsia Australia nian iha eleisaun Timor-Leste nian

Governu Austrália kritika planu Governu Timor-Leste nian atu
dezenvolve forsa militar no hatudu ho ida ne'e katak sira halo
interferénsia polítika durante kampaña ba eleisaun; atitude ne'e ami
la simu tamba viola soberania ema Timor nian, lideransa partidu
maioria FRETILIN hatutan ohin.

Ministru Negósius Estranjeirus Austrália nian, Alexander Downer ho
ninia "peritus defeza nian", nebé iha relasaun ho Servisus
Intelijénsia Austrália nian, hato'o sira nia krítika ba planu longo
termu "Forsa 2020", ne'ebé Governu RDTL atu halao iha Timor-Leste.

Planu Forsa 2020 iha objetivu atu rezolve difikuldade bo'ot ne'ebé
mosu ho formasaun nebé Autoridade Tranzitória ONU fó ba forsas
armadas Timor-Leste nian molok fulan Maio 2002 to'o fulan Maio 2004
no durante Primeiru Governu Konstitusional.

Prezidente Partidu FRETILIN Francisco Guterres "Lu Olo", hateten
ohin: "Ami hakfodak bainhira ami rona Ministru Negósios Estranjeirus
Austrália nian hateten katak ami labele iha armas helikópteru no ró
funu nian ne'ebé efetivu hodi halo patrulha ba ami nia rikun soin iha
Tasi Timor hanesan minarai no peskas. Forsa Defeza Austrália nian
la'os halo hela operasaun iha ami nia nasaun ho ekipamentu hirak
ne'e?

"Planu forsa 2020 la'os atu halao buat bo'ot ida tamba fó forsa deit
ba soldadu militar 3000, rihun tolu. Ohin loron, forsa regular
hamutuk hotu 1,500, reserva nian, 1,500".

"Istória ne'e bazeia ba jornal australianu, The Australian, nebé iha
semana kotuk hakerek nar'naran deit kona ba implementasaun ba desizaun
Governu nian ne'ebé fó autoridade bá Ministériu Defeza bele halo
aprovizionamentu (procurement) ba osan US$100,000. Ministérius sira
seluk haksolok no implementa desizaun ne'e no ida ne'e fó mos
oportunidade ba dezenvolve kapasidade gestaun F- FDTL nian.
La'os hanesan jornal australianu hato'o. Ami la hamenus Parlamentu
ninia autoridade ho desizaun ida ne'e."

"Forsa 2020 mak ami nia planu nasional ba forsa armadas no ami nia
nasaun iha osan ba halao ida ne'e to'o tinan 13", Lu Olo hatutan.
"Planu ne'e atu moderniza no sei halo Forsas Armadas Timor-Leste nian
sai profisional hodi sira bele kolabora didiak ho forsas armadas hosi
nasaun sira seluk."

Kolaborasaun ne'ebé mak diak sei fó oportunidade diak ba forsas
Timor-Leste atu bele partisipa iha Forsas internasionais ho misaun ba
Paz nian no hala'o kna'ar efetivu ho forsas armadas hosi nasaun
Sudeste Aziátiku no mos hó Australia atu nune'e bele kontribui mós ba
halo kombate hasoru ameasa terorismu iha mundu."
Lu Olo hatutan: "Forsas armadas modernas ne'e la'os deit atu defende
soberania nasional no integridade teritorial, maibe, atu defende mós
Timor-Leste ninia rekursus nasionais. Hanesan ezemplu, governu
Timor-Leste lakon milliaun US$35 iha area peskas tinan-tinan tamba
atividade ilegal; ida ne'e ita nia direitu no dever hanesan nasaun
atu proteje ita nia rekursus renováveis (bele iha bei'beik, se uza ho
kuidadu) hodi fó benefisiu be'beik ba ita nia nasaun."

Lu Olo hatutan FALINTIL, forsa guerilla nebé luta ba independénsia
durante okupasaun militar indonézia, to'o tinan 1999,halao guerilla
núdar unidade forsas armadas ki'ik, hanesan pelotao ida nia forsa."

"Tranzisaun hosi unidade ki'ik ba fali batallaun no kompañia liu hosi
prosesu ida ké artifisial tebe-tebes," katak Lu Olo. "ONU mak husu
Queen's College halo estudu ne'e no sira identifika katak opsaun nebé
sira hili mak baratu liu – baratu liu tamba presiza deit kuartel rua.
Maibé la iha ema Timor ida mak iha esperiénsia atu halo jestaun ba
divizaun bo'ot hanesan ne'e"

"Forsa 2020 hanesan prosesu ida atu hanoin fila fali no reorganiza
fali forsa armadas (F- FDTL), maibé, tamba akontesimentu iha fulan
Janeiro-Juñu 2006, membrus balu forsas armadas no komando polisia
nian monu mos ba kampaña politika mosu iha ita nia rain no ikus liu,
iha kampaña militar atu hatun governu konstitusional."

"Governu Australia hatene kona-ba prosesu Forsa 2020, tamba sira iha
assesor iha Ministériu Defeza."

Revista Austrália nian, The Bulletin, iha loron 6 Juñu 2006 hato'o
reportazem kona ba militar senior Australianu nebé Austrália haruka
mai Timor-Leste iha tinan 2000 no tinan sira seluk hodi ajuda harii
ita nia forsas armadas . Revista ne'e dehan katak ofisiais australianu
sira ne'e hirus no tatoli katak governu Australia nunka iha
intensaun atu halo F- FDTL atu sai forsa ida ké metin hó treinamentu
diak no sira halao programa treinamentu ida ké la diak.

Artigu iha The Bulletin hatutan katak Forsa Defeza Australia hato'o
surat ida ba nia xefi iha loron 10 Maiu 2001 katak:

"Objetivu ba dala uluk… atu habelar Austrália ninia interese
estratéjiku iha Timor-Leste, ho: evita asesu, iha asesu no influénsia.
Interese estratéjiku atu evita asesu hodi garante katak la iha tan
forsa seluk mak iha asesu ba Timor–Leste, maibé, Austrália deit mak
bele iha asesu, liu-liu, hosi ADF. Austrália ninia interese
estratéjiku bele hetan protesaun diak liu sé Austrália bele influensia
buat ruma iha prosesu foti desizaun iha Timor-Leste."

Sekretáriu Jeral FRETILIN nian, Dr. Mari Alkatiri hatutan katak
FRETILIN fó laran tomak no servisu makas ba implementa Planu Nasional
Dezenvolvimentu, ne'ebé fo prioridade ba edukasaun, saúde no uma ba
ema hela, no mos kria kampu servisu hosi programa bo'ot infrastruturas
nian no kontinua dezenvolve agrikultura, atu hetan kreximentu Produtu
Internu Brutu (PIB ka GDP) 7% tinan-tinan.

"Hosi eventus trájikus ne'ebé akontese iha fulan 15 kotuk nia laran,
ita bele haré katak ita tenke harii duni ita nia forsas armadas no
forsas polísia nian ho profesionalismu no la involve hó partidu,
forsas nebé bele ajuda dezenvolvimentu nasional no bele halo parte
misaun paz ONU nian," hatutan Dr. Alkatiri.

"Debate ne'ebé hahú ona iha Australia atu hatun no hapara planu Forsa
2020 reflekte hanoin ADF nian katak sira tenke influensia desizaun
governu Timor-Leste nian, no sira tenke tau nafatin sira nia forsas
iha ne'e. Buat hirak ne'e ita labele simu, ida ne'e viola soberania
ne'e bé ita manan, soberania ida nebé ema atus ba atus mak mate ba ita
hetan".

Dr. Alkatiri hatutan: "governu Austrália no media Austrália nian halo
interferénsia iha kampaña eleisaun atu hatún FRETILIN bainhira sira
halo ema iha dúvida ba FRETILIN ninia dedikasaun ba halakon kiak no
hari fila fali dame iha ita nia rain. Ami la simu interferénsia
politika."

Atu hetan tan informasaun, favór kontakta ho José Teixeira +670 728
7080 ka FRETILIN media ho fretilin.media@gmail.com

www.timortruth.com, www.fretilin-rdtl.blogspot.com

Sem comentários: