Komunikadu ba Imprensa - FRETILIN EZIJE: RAILÓS NINIA KAZU LABELE IHA INTERFERÉNSIA POLITIKA

FRENTE REVOLUCIONÁRIA DO TIMOR-LESTE INDEPENDENTE

FRETILIN

KOMUNIKADU BA IMPRENSA
4 Outubru 2007

FRETILIN EZIJE: RAILÓS NINIA KAZU LABELE IHA INTERFERÉNSIA POLITIKA

FRETILIN haksolok ohin tamba polísia kaer ona Railós, ema ne’ebé halo mo’os parte tentativa golpe estadu nian, ne’ebé hamosu hó violénsia hasoru Governu FRETILIN nian, iha tinan kotuk. FRETILIN ezije governu RDTL atu labele halo interferénsia polítika iha Railós ninia kazu hodi responsáveis prosesu judisial nian bele halao sira nia servisu investigasaun no julgamentu tuir lei.

Aniceto Guterres, lider bankadaFRETILIN nian, hatete katak nia hein katak hó investigasaun no julgamentu ba Vicente da Conceição, alias Railós, sei bele identika responsáveis prinsipais sira seluk ne’ebé halo parte iha tentativa golpe de estadu.

UNPOL no PNTL kaer Railós horseik hafoin Sekretáriu-Jeral FRETILIN nian, Mari Alkatiri, hatete ba Komandante UNPOL sexta-feira kotuk, katak sé UNPOL la kaer Railós, militantes FRETILIN maka sei kaer, sei la halo a’at ba nia no entrega nia ba UNPOL.

Iha Outubru 2006, Komisaun Espesial Independente Nasoens Unidas nian halo inkéritu no rekomenda katak Railós tenke hatán ba justisa kona ba atake ne’ebé nia rasik lidera hasoru kuartel-jeral F-FDTL nian, iha Tasitolu, iha 24 Maiu 2006, ne’ebé ema nain sia maka mate. Komisaun ne’e mos hatete katak Railós tenke hatán ba justisa tamba “ lao ba mai ho kilat ilegal”.

Aniceto Guterres dehan ohin katak polísia kaer Railós ho mandadu kaptura ne’ebé hasai iha 13 Setembru 2007.

Guterres hatete: Railós lao ba mai ho liberdade tinan ida nia laran tamba lideres politikus balun inkluindu José Alexandre Gusmão ( horiuluk Prezidente , agora Primeiru Ministru) fó protesaun ba nia

“ Gusmão uza Railós momós hela, núdar koordenador kampaña ba ninia partidu CNRT iha eleisoens lejislativas no Railós halo tauk eleitores sira iha distritu Liquicá no Ermera”.

Guterres koalia mos kona ba relatóriu ne’ebé Misaun Observasaun husi União Europeia ható kona ba eleisoens iha Juñu tinan kotuk, ne’ebé tatoli: “ Hanesan ami hatete tiha ona iha deklarasaun uluk hafoin eleisaun prezidensial, liu tiha segunda ronda, Misaun Observasaun Eleisoens hosi União Europeia , preokupa ho envolvimentu Vicente da Conceição nian, aliás, Railós, núdar koordenador kampaña CNRT nian, iha distritu Liquiçá, maibé, Nasoens Unidas ninia Komisaun Espesial Independente, Komisaun ne’ebé NU hamosu ba halao investigasaun kona ba akontesimentus ne’ebé hamosu krize iha Maiu 2006 nian, halo rekomendasaun katak Railós tenke hatán ba akuzasaun katak nia halo krime. (http://www.eueomtimorleste.org/parl/PDF/EUEOM%20TL%20Parliamentary%20Elections%20FINAL.pdf).

Guterres hatete: “ FRETILIN fiar katak investigasaun no julgamentu Railós nian sei ajuda identifika ema sira ne’ebé halo gole armadu hasoru Governu FRETILIN nian. Atake ne’ebé Railós halo ba kuartel FDTL, hamutuk ho atakes ne’ebé militar fujitivu Alfredo no Komandante Adjuntu Abilio Mesquita halo maka ajuda hatún Governu FRETILIN.

“ Iha 27/9/07, FRETILIN aprezenta kópia karta ida nian, iha Parlamentu Nasional, ne’ebé Prezidente Gusmão no Komandante Paulo Martins hakerek iha 29/5/07, ne’ebé hatete katak Railós ho ninia grupu halao hela “servisu ofisial” no autoridades labele impede sira lao ba mai iha Timor-Leste. Paulo Martins ohin loron sai deputadu partidu CNRT, Gusmão ninia partidu.”

“ Iha tempu ne’ebá, Railós no ninia grupu lao hela ho kilat no foin partisipa iha atake ida ba kuartel F-FDTL nian iha 23-24 Maiu 2006”.

“ Karta ne’ebé sira nain rua assina fó direitu ba Railós kaer kilat apezar de Prezidente Gusmão assina tiha ona akordu ida ba konvida forsas internasionais mai Timor-Leste hó objetivu atu hasai kilat husi grupu hotu-hotu, inkluindu polísia.

“ Ida ne’e hatudu katak Gusmão maka uza Railós ba hahalok ne’ebé la tuir lei tamba núdar Prezidente Repúblika, nia la iha autoridade ba fo autorizasaun ba Railós kaer kilat. Ne’e ezemplu ida ta’an ne’ebé hatudu katak Gusmão la respeita leis Timor-Leste nian “.

“ Guia de Marcha ne’e maka fó liberdade ba Railós halo tauk eleitores sira iha Liquiçá, Ermera no Bobonaro. Railós hetan mos ho ekipa televizaun Australia nian, ABC, programa “Four Corners”, ne’ebé halo filme ho alegasaun falsu no halo difamasaun ba ex-Ministru Interior, Rogério Lobato no Mari Alkatiri, katak sira fó filat ba ema sivil sira hodi oho plitikus oposizaun nian”.

“Hanesan ita hotu hatene, alegasaun hosi Railós falsu. Investigasaun la hetan provas hasoru Dr. Mari Alkatiri no julgamentu Rogério Lobato nian hatudu katak Rogério Lobato fó duni kilat ba sivís sira, maibé, ho intensau atu sira ajuda polísia bainhira rebeldes armadus sira ataka instituisaun estadu nian ”.

Hakarak hatene ta’an informasaun, bele dere arame bá:
José Teixeira, (+670) 728 7080
www. Timortruth. Com, www. Fretilin-rdtl.blogspot.com