COMUNICADO : ABUT IDA DEIT, NEON IDA DEIT UMA IDA DEIT

FRENTE REVOLUCIONARIA DO TIMOR-LESTE INDEPENDENTE
FRETILIN

Komunikadu

Hahu husi loron 25 to’o 28 fulan Outobro tinan 2007, Partidu FRETILIN hala’o RETIRU Nacional iha Distritu Manufahe ( Same ) Suku Holarua, Aldeia Fahi-Luhan.

Objektivu bo’ot retiru nian mak ne’e: Desafius iha Tempo Uluk, Tempo Agora no Tempo Aban nian.

Objektivu Espesifiku mak :

Retrospektiva Historika Partidu, afirmasaun ba Konstrusaun Estadu de Direitu no mos konsekuensia planu Golpe hasoru Governu FRETILIN nian nebe hahu husi 4 de Desembru 2002 to’o krise 28 de Abril tinan 2006; Pozisaun FRETILIN nian kona ba Governu agora daudaun ( aktual );

Perspektivas Partidu nian ba konsolidasaun Estadu Direitu Demokratiku, Soberania no Independesia Nasional, relasaun Timor Leste nian ho Rai Sudeste Asiatiku -liu liu Australia ho Indonesia-no Mundo tomak.

Durante loron rua nia laran, representantes nebe mai husi Distritus 13 hamutuk ho Direksaun Partidu nian debate asuntus hirak iha leten no hare katak desafius barak ba Partidu iha ohin loron no mos ba Futuru. Nune’e, partisipantes sira hare mos ba frakezas hirak nebe Partidu hasoru no mos saida mak atu halo nu’udar resposta ba desafius hirak ne’e.

Intervensoins barak hato’o iha Retiru ne’e identifika problemas makmai ne’e:

Precisa halao Reajustamentu imediatu ba Estruturas Partidu nian iha Base;

Precisa halo revisaun ba metodo implementasaun ba Decisaun hirak nebe mak orgaun central hola tiha ona;

Habelar informasaun nebe sistematiku ba publiku liu-liu ba Militantes no Simpatizantes iha Base;

Precisa hametin fila fali dever selu Quota nebe mak decide tiha ona, tuir Estatuto haruka, atu nune’e bele hamoris rekursu financeiru Partidu nian;

Hasae kapasidade organizativa iha Base nebe sei fraku;

Haburas aktividade Partidu nian ho Regulamentu tuir Estatuto Partidu nian;

Hametin Unidade Partidu nian no resolve kontradisaun iha tempo badak;

Defini Plano de Aksaun no Estrategia atu hatan ba situasaun aktual no kaer metin interese nasional tuir Konstituisaun RDTL nian;

Hamoris ambiente konfiansa (ka fiar malu) iha Partidu nia laran atu halakon desintendimentu entre Quadrus no Militantes;

Hasa’e kapasidade Quadrus no Militantes liu husi formasaun Politika;

Hasa’e partisipasaun Feto no Organizasaun Massas Juvenis, Veteranus no Antigus Kombatentes iha Aktividade Politika Partidu nian iha nivel hotu-hotu;

Hasa’e konsiensializasaun Patriotika Povu Maubere nian hodi hakat ba Marsa Paz iha segunda luta ba Libertasaun Nasional iha 2008;

Kombate sentimentu rejionalismu, no hamoris sentimentu de pertensa bo’ot ba Partidu;

Decisaun:

Durante loron rua ne’e, Direksaun ho Representante Partidu nian husi Distritu 13 decide:

Katak sei promove Dialogo Nakloke iha Distritu hotu-hotu hodi:

1.1 Konsolida Bases de Apoio Partidu nian ( Caixa Clandestina, Antigos Combatentes no Veteranus )

1.2 Mobiliza no Organiza Marsa Nasional ba Paz, defesa ba Direitus Democratikus, Justisa, Liberdade no Integridade Nasional.

Rekomenda ba Lideransa Partidu hodi hasai desizaun atu halo Restruturasaun/Reajustamentu Estrutural Partidu nian iha Nivel Media no Base

Rekomenda ba Direksaun Paritdu liu-liu ba CCF no CPN atu hasai Deklarasaun katak Futuro Governu FRETILIN nian la simu no sei halo revisaun kasu ba kasu ba kompromissus Internasionais hotu-hotu, hanesan halo tusan ba Banko Mundial, FMI no Rai seluk no Kompromissu ba Soberania Nasional, ekplorasaun ba Mina Rai, Gas no selu-seluk tan, nebe Governu Inkonstitusional no de Faktu lidera husi Senhor Jose Alexandre Gusmão hala’o durante sira nia Governasaun Inkonstitusional;

Apela ba Militantes Partidu nian no Povu Maubere tomak atu tu’ur hakmatek no hakse’es an husi hahalok violensia hotu-hotu nebe bele hamosu instabilidade iha ita nia Rain;

Hametin aliansas ho forsas politikas no sociais nee’be iha tiha ona hanesan AD, ( Kota-PPT), PDRT, CPD RDTL no seluk tan;

Haburas no hametin relasaun ho forsas politik no sociais iha rai laran no railiur nebe fiar iha interese komum

Reafirma apoiu inkondisional ba apelo Direksaun Partidu nian ba Paz no Estabilidade;




Manufahe, 27 Outubro 2007




Francisco Guterres “ LÙ-OLO
Presidente

Mari Bin Amude Alkatiri
Secretariu-Geral