Komunikadu Imprensa - FRETILIN fo orientasaun ba militantes sira halo asaun dame bainhira halo manifestasaun hasoru Governu inkonstitusional

FRENTE REVOLUCIONÁRIA DO TIMOR-LESTE INDEPENDENTE
FRETILIN

Komunikadu imprensa
16 Agostu 2007

FRETILIN fo orientasaun ba militantes sira halo asaun dame bainhira halo manifestasaun hasoru Governu inkonstitusional

FRETILIN, partidu maioritáriu Timor-Leste nian, husu ba militantres no apoiantes sira atu labele uza violénsia bainhira halo manifestasaun hasoru desizaun inkonstitusional Prezidente Ramos Horta nian tamba nia konvida CNRT ho ninia aliadus ba forma Governu em vez de konvida FRETILIN.

Deputadus no membrus lideransa FRETILIN nian vizita distritus hodi ható mensajen dame nian ba militantes no apoiantes FRETILIN nian.

José Reis, Sekretáriu-Geral Adjuntu halao kna’ar ne’e iha Viqueque no Baucau, José Manuel Fernandes, Sekretáriu-Jeral Adjuntu halao iha Covalima, deputadu Estanislau da Silva iha Dili no Manatuto, deputada Ana Pessoa iha distritu Bobonaro, deputada Cipriana iha Dili, no deputadu José Teixeira halao iha Manufahi.

Arsénio Bano, Vise-Prezidente FRETILIN nian hatete: “ Lideres no deputadus FRETILIN nian hakat ba distritus fim-de-semana kotuk hodi husu ba militantes no apoiantes sira labele uza violénsia no bele halo deit asaun dame hasoru governu inkonstitusional ne’e”.

“FRETILIN ninia posizaun klaru no hanesan nafatin horiuluk. Ema ne’ebé deit mak uza violénsia, halo ka la halo parte partidu polítiku ida ne’ebé deit, ne’e kontra lei” Bano hatete.

“Ami sei vizita mo’os distritus sira seluk hodi ható mensajen ida ne’e ba ami nia militantes no apoiantes sira”.

”Prezidente da Repúblika hola desizaun ida ké inkonstitusional tamba nia la konvida partidu ne’ebé manan votus barak liu, maibé, nia konvida fali grupu ida ke harii depois das eleisoens . Tuir lolós Prezidente Repúblika fó oportunidade ba partidu ne’ebé manan atu halao negosiasaun ba forma governu ida ké reprezenta eleitoradu ninia hakarak no la afekta estabilidade.”

“Ami explika iha baze katak FRETILIN nia proposta ikus liu maka formasaun Governu Grande Inkluzaun lideradu hosi Primeiru – Ministru independente ho Vise-Primeiru Ministru rua, ida hosi FRETILIN , ida hosi CNRT.“

“Ami ható proposta formasaun Governu Inkluzaun Bo’ot tamba ami haré ba rezultadus eleisoens 2007 nian. Rezultadus ne’e hatudu katak eleitoradu hakarak lideransa sira servisu hamutuk hodi ita bele moris ho hakmatek no rai ne’e hetan estabilidade”.

“Prezidente Ramos Horta apoia proposta ne’e, maibé, Sr. Xanana Gusmão la simu proposta ne’e. Sr. Xanana hakarak hodi bi’it katak Prezidente Repúblika hatudu nia núdar Primeiru-Ministru , maibé, ninia partidu la manan iha eleisoens 2007 no hetan deit 24%”.

Bano rejeita akuzasaun Sr. Xanana Gusmão katak lideres FRETILIN nian ba distritus ba haforsa tan violénsia.

Bano hatete, “Hafoin Prezidente Repúblika anunsia formasaun Governu Inkonstitusional , ami fó kedas orientasaun ba halao manifestasaun pasífiku no ami halo esforsu hotu ba akalma situasaun (haré komunikadu imprensa – Deklarasaun 6 Agostu 2007). Senhor Xanana hakarak ema hotu hotu atu simu nia hanesan PM biar nia la iha lejitimidade tamba hetan deit votus 24%”.

“Em vez de akuza deit ema seluk, Sr. Gusmão tenke haré ba nia a’an rasik no hanoin katak nia, bainhira sei kaer hela kargu Prezidente Repúblika, kontribui ba krize 2006 nian tamba koalia lia fuan kroat ba ema no haforsa divizaun loro-monu ho loro-sae . Nia mo’os ataka FRETILIN bei’beik no halo akuzasaun ne’ebé falsu hodi buka hatún FRETILIN ninia popularidade.

Bano hatete “ Sr. Gusmão la haré realidade katak 76% eleitoradu la vota ba CNRT no hosi ne’e barak mak la simu nia núdar Primeiru-Ministru tamba la tuir Konstituisaun”.

“ Sr. Gusmão tenke haré katak eleitoradu hola inisiativa barak atu hatudu sira ninia hirus hasoru desizaun Prezidente Repúblika nian. Eleitoradu hatene katak sira manán, maibé, vota saugate deit, tamba Prezidente Repúblika la respeita rezultadu eleisaun 2007 nian”

“Se maka iha responsabilidade ba lei no orden mak UNPOL, Forsas Internasionais Estabilizasaun no PNTL, la’os FRETILIN. “, Bano hatutan.

“Senhor Xanana hanesan PM la iha ona kbi’it atu akalma situasaun, diak liu rezigna a’an deit. Tamba Senhor Xanana hakarak obriga a’an deit atu sai PM maka krizi hahú iha 2006 no hatutan tan to’o agora”, hakotu Arsénio Bano.


Hakarak hatene tan informasaun bele kontakta ho:

Arsenio Bano (+670) 733 9416, Jose Teixeira (+670) 728 7080, FRETILIN Media (+670) 733 5060 and fretilin.media@gmail.com
www.fretilin-rdtl.blogspot.com, www.timortruth.com