Komunikadu Imprensa - FRETILIN husu apoiu ba Prezidente da Repúblika ninia pozisaun kona-ba justisa

Vota ba FRETILIN!
Eleisaun Parlamentár 2007

"Defende independensia Timor-Leste nian"

Komunikadu de Imprensa
20 Juñe 2007

FRETILIN husu apoiu ba Prezidente da Repúblika ninia pozisaun kona-ba justisa

FRETILIN hatete ohin katak FRETILIN apoia Sr. Prezidente José
Ramos-Horta nia pozisaun ne'ebé nia fó-sai públikamente katak amnestia
labele fó ba "krimes graves ka krime kontra humanidade" tanba ne'e "la
konsistente (la la'o hanesan) ho lei internasionál".

Hanesan partidu ne'ebé iha maioria iha Timor-Leste, FRETILIN husu ba
partidu hotu-hotu atu fo sira nia apoiu ba Sr. Prezidente Ramos-Horta
nia deklarasaun hanesan fó-sai iha reportajen AAP nian iha loron 15 de
Juñu 2007.

Kandidatu FRETILIN ba parlamentu, Aniceto Guterres, ohin dehan,
"hanesan Sr. Prezidente Ramos-Horta, FRETILIN fiar katak atu hetan
justisa tenke halo uluk investigasaun loloos kona-ba krime sira ne'e,
hodi lori to'o julgamentu ho sentensa. Ne'e tanba respeitu ba direitus
humanus ho lei maka importante liu ba ita nia demokrasia ne'ebé foin
moris. Rai ki'ik-oan sira hanesan ita nian sempre iha fé ba lei
internasionál hanesan buat úniku ida, ne'ebé bele fó seguransa ba
nasaun-ki'ik sira.

"FRETILIN maka úniku instituisaun polítika ne'ebé sempre defende ho
konsisténsia direitu vítima sira bainhira hetan abuzus ba direitus
humanus iha Timor-Leste.
"FRETILIN maka insiste katak lejislasaun atu harii Comissão de
Acolhimento, Verdade e Reconciliação (CAVR) ho Comissão da Verdade e
Amizade (CTF) labele inklui amnestia ka imunidade ba ema sira ne'ebé
komete krimes graves entre tinan 1975 ho 1999. Ami halo nune'e hodi
tuir nafatin ita nia kometimentu ba prinsípius lei internasionál nian.
Ami reziste presaun oioin hosi líder polítiku balu, inklui líder balu
ne'ebé tuir hela eleisaun ne'e, hodi garante katak justisa ho lei
tenke hamriik-metin nafatin."

Guterres kontinua katak "amnestia labele sai hanesan prekondisaun ba
kooperasaun iha investigasaun. Amnestia hanesan buat ida atu ita uza
de'it iha situasaun ne'ebé apropriadu (loloos), hanesan porezemplu,
karik amnestia ne'e bele lori ita ba deskobre lia-loos ne'ebé esensiál
mós ba ita atu alkansa justisa ho rekonsiliasaun."

Guterres dehan katak CAVR ho CTF la'ós pontu hahú de'it ba iha dalan
buka justisa. FRETILIN sei fó prioridade aas no mós sei inisia lalais
debate kona-ba rekomendasaun hosi Relatóriu Finál CAVR nian
("CHEGA!").

Nia dehan, "dalan ba buka justisa ne'e esensiál ba nasaun ida ne'e
tanba krime sira 1999 nian mós la rezolve lolós. Tanba ida ne'e maka
ema balu ne'ebé uluk envolvidu ho milísia pro-autonomia nian ohin
loron kaer fali pozisaun aas iha partidu polítiku balu ka sai hanesan
kandidatu ba eleisaun parlamentár ida atu mai ne'e. Ne'e katak sira
mós sei bele sai eleitu ba Parlamentu Nasionál, órgaun aas liu iha
Timor-Leste ne'ebé bele halo lei. Eleitór sira tenke hatene partidu
sira seluk nia pozisaun kona-ba kestaun ida ne'e.

"Ha'u dezafia partidu polítiku sira seluk atu deklara sira nia
pozisaun loloos kona-ba kestaun ida ne'e hanesan ami halo tiha ona.
Ami simu ona krítika balu maibé ami hetan apoiu barak liu kona-ba ami
nia pozisaun ida ne'e. Ida ne'e maka buat loos atu ita halo no ami sei
kontinua nafatin ho ida ne'e."

Kona-ba Timor-Leste nia relasaun ho Indonézia Guterres dehan,
"Importante duni katak ita tenke iha relasaun di'ak ho ita nia viziñu
sira. Buat ida ne'e governu FRETILIN sempre halo. Ami sei fó
importánsia ida aas tebetebes kona-ba promosaun ba relasionamentu diak
ho Indonézia ho ninia povu.

"Maibé, ida ne'e labele satan fali ita nia nasaun atu hetan justisa ka
abandona fali prosesu rekonsiliasaun entre nasaun rua ne'e.

"Kuandu FRETILIN ko'alia kona-ba justisa, ami la'ós ko'alia ibuibun
de'it ka teoria de'it. Ami iha duni kometimentu ba justisa, ba
lia-loos ho ba oinsá taka filafali kanik sira ne'e, ne'ebé sei lori
rekonsiliasaun loloos ba povu Timor-Leste. Povu Timor-Leste merese atu
hetan prosesu judisiál ho aplikasaun lei ne'ebé loloos no ho
dignidade.

"Ami simu ho laran-tomak Prezidente nia deklarasaun sira foin daudauk
ne'e hodi fó apoiu ba supremasia justisa nian ho aplikasaun ba lei
tuir lei internasionál kona-ba krimes graves ho krime kontra
humanidade."

Atu hetan tan informasau, favór kontakta ho:
José Teixeira (+670) 728 7080, Aniceto Guterres (+670) 723 8569
www.timortruth.com, www.fretilin-rdtl.blogspot.com