Komunikadu Imprensa - FRETILIN ejize investigasaun kona ba kazu CNRT nia membru mate tamba hetan tiru.

FRENTE REVOLUSIONÁRIA DO TIMOR-LESTE INDEPENDENTE

FRETILIN

____________________________________________________________________________

Komunikadu inprensa

3 Juñu 2007

FRETILIN ejize investigasaun kona ba kazu CNRT nia membru mate tamba hetan tiru.

FRETILIN, partidu polítiku bo’ot liu iha Timor-Leste, ezije ohin atu iha investigasaun independente lolós kona ba kazu ne’ebé ema sivil armadu ida , husi ekipa kampaña CNRT nian, mate ohin tamba hetan tiru husi polísia distritu Viqueque nian.

Dr. Mari Alkatiri, Sekretáriu-Jeral FRETILIN nian, hatete katak tenke halao investigasaun tomak ida hodi haré lolós faktus no sirkuntánsias (saída mak akontese, oinsá, akontese iha nebé, sé mak oho no tamba sá) kona ba kazu nebé Afonso Kudalai mate tamba hetan tiru.

Alkatiri hatutan” katak tenke halao inkéritu ida ba explika tamba sá mak membru ekipa kanpaña partidu polítiku nian lao ho kilat no hodi hatene sé mak fó kilat ba nia”.

“Ïnvestigasaun ne’e tenke halao ho envolvimentu Gabinete Prezidente nian, Governu Timor-Leste nian no Polísia Nasoens Unidas nian”.

Alkatiri hatete katak nia simu informasaun katak kazu ne’e akontese bainhira ekipa CNRT nian ba husi Uatolari ba Ossú.

Alkatiri dehan “FRETILIN kondena violénsia hotu-hotu no provokasaun sira nebé ema halo iha kampaña. Ema sira nebé kulpadu duni tamba halao violénsia tenke kaer no lori sira ba julgamentu hodi hasoru justisa”.

Hakarak hatene tan informasaun, bele dere arame ba:

Fretilin media (+670) 733 5060 selae email fretilin.media@gmail.com