DEKLARASAUN SEKRETÁRIO-GERAL FRETILIN, MARI ALKATIRI, TINAN IDA LIU TIA HUSI NIA RESIGNASAUN HOSI KARGU PRIMEIRU MINISTRU RDTL NIAN

FRENTE REVOLUCIONÁRIA DO TIMOR-LESTE INDEPENDENTE

FRETILIN

Rua dos Mártires da Pátria, Comoro, Dili, Timor-Leste,

D E KLARASAUN

Iha fulan 12 liu ba, iha duni fatin ida ne'e, tamba forsa sirkunstansias nian, hau apresenta hau nia resignasaun nudar Primeiru Ministru I Governu Konstitusional Timor-Leste nian

Hau halau buat ne'e atu evita fakar ran. Hau halu ne'e ho hanoin atu bele kontribui ba resolusaun krise nebe ita hasoru no fo'o oportunidade ba ema seluk atu bele resolve krise ne'e

Tinan ida liu tiha onan, maibe krise nebe ita moris ne'e la resolve. Problema petisionarius sira nian la resolve, liu tan problema Alfredo Reinadoi nian. Ita sei hasoru nafatin hela problema deslokadus sira nian.

La tuir buat nebe ita hotu hein, hau nia resignasaun la serve atu evita ran fakar nafatin, destruisaun no ausensia lei ho ordem nian. Ema sei sunu uma nafatin, ema sei hasoru violensia nafatin ema sei hatauk ema seluk nafatin. Estadu lakon tiha nia autoridade, no estadu de direitu demokratiku nebe ita hari horas ne'e komprometidu tiha onan. Hosi buat sirak ne'e hotu ita nia sosiedade komesa hanoin katak lei sei la labele tau liman ba sira. Ita komesa fo mahon ba ema sira nebe lolos tenki ba hatan iha justisa.

Hau nia resignasaun nebe la kontribui ba hakotun krise, hatudu katak responsabilidade krise ne'e nian laos iha FRETILIN nia liman, maibe iha ema sira nebe buka ho dalan hotu-hotu atu halu rahun tiha FRETILIN, maibe la hanoin konan ba konsekuensia saida maka sira halu. Se karik FRETILIN maka laiha toleransia buat sei sai at liu tan.

Ita tama iha periodu eleisaun gerais ho fiar ida katak eleisaun bele sai nudar xave atu resolve ita nia problema tomak. Maibe, iha ronda rua eleisaun Presidensiais nia laran, ema balu halu buat nebe la tuir dalan, nebe obriga FRETILIN hodi apresenta keixa ba iha Komisaun Nasional Eleisaun nian. FRETILIN ho aten bo'ot simu resultadu, atu nune eleisaun legislativas bele halau iha data nebe ita marka tiha onan. Ne'e duni bele dehan dala ida tan katak susesu eleisaun presidensiais nian bele iha tam ba kapasidade toleransia no sentidu estadu nebe FRETILIN no nia lideransa iha.

La to'o semana ida ona maka ita sei ba hikas iha urnas atu halau ita nia direitu atu vota iha kuadru legal nia laran nebe estabelese tiha onan atau garante eleisaun ida nebe livre no justa.

Ita hotu bele hare'e Partidu Konsellu Nasional Rekonstrusaun Timorense nia hahalok nebe hanoin katak nia iha lei nia leten, katak nia lalika halu tuir lei nebe Timor iha.

Dalan uluk kedas Partidu Konsellu Nasional Rekonstrusaun Timorense uza sigla ida nebe bele lohi ema " CNRT" no tenta subverte istória no sentidu nasaun nian. Iha 1999 CNRT ne'e nudar buat ida Timor oan hotu nian, maibe agora Xanana buka atu halu buat ne'e hanesan ninian rasik, buat nebe hatudu katak nia la koalia lian los.

Tuir mai, CNRT kontinua uza simbulu Partidu FRETILIN nian iha nia kampaña no iha nia material propaganda nian, buat nebe viola momos los Lei Eleitoral.

Iha terseiru lugar, CNRT uza loron-loron liafuan nebe buka hateten at ema seluk no hatun ema seluk ho objektivu atu atinji lideransa FRETILIN nian, buat nebe la tuir Kodigu Konduta nebe partidu politikus tomak, hanesan mos CNRT rasik asina

Iha kuartu lugar, CNRT mos foti Vicente Conceição (Railos) nudar nia kordenador kampaña iha Liquiça, wainhira hatene katak Komisaun Espesial Inkeritu Nasoens Unidas nian hatama Railos nia naran iha lista ema nebe tenki hetan investigasaun, no mos iha desizaun hosi Tribunal Distrital Dili nebe husu atu notifika Railos, tamba nia envolvimentu iha krise 2006

Iha kintu lugar, CNRT mos hatama Paulo Martins, nebe uluk nudar Komisariu Polisia Nasional nian iha nia lista nudar kandidatu ba deputadu, ema nebe Komisaun Espesial Inkeritu Nasoens Unidas hatudu nudar ema nebe responsavel ba fahe kilat ba grupu ilegal ida nebe Adjuntu Abilio Mesquita komanda, grupu ida nebe ataka uma Brigadeiru-Geral Taur Matan Ruak nian.

Ne nudar exemplu balu hosi komportamentu CNRT nian nebe hatudu katak partidu ida ne'e halu buat la tuir lei, hahalok nebe bele estraga prosesu eleisaun legislativas nebe livre, justa no demokratika.

Agora ita mos husu hela, karik CNRT sei simu resultadu eleisoens nian ? Xanana ne'e nudar ema ida nebe bele uza buat hotu, saida deit, naran ke nia manan, nia mos lagosta atu simu wainhira nia lakon. Xanana hatudu hori wain kedas katak nia iha oituan oi laiha liu kedas respeitu ba demokrasia, nia hanoin katak nia iha Lei no Konstituisaun nia leten.

Komportamentu CNRT no nia lidere nian la kontribui ba resolusaun krise politika maibe sei halu buat hirak ne'e sai at liu tan, tam ba nia hahalok la haburas estadu de direitu no demokrasi nebe forte. CNRT ne'e nudar buat ida atu hatutan deit Xanana Gusmão nia politika " HALIBUR HAMUTUK ATU BELE KOMANDA OU FAJE TIHA ATU BELE UKUN"

Dili, loron 26 Fulan Juñu tinan 2006

Dr. Mari Alkatiri

Sekretariu Jeral FRETILIN