Komunikadu Imprensa - Fretilin iha istória forte kontra korrupsaun

Vota ba FRETILIN!
Eleisaun lejislativa 2007

"Husi Povu, ho povu, ba povu"

Komunikadu imprensa

30 Maiu 2007

Fretilin iha istória forte kontra korrupsaun

Portavós partidu ida dehan Governu Fretilin Timor-Leste foti
aprosimasaun "toleránsia zero" ba korrupsaun no harii tiha estrutura
legál ho institusionál atu kombate abuzu de podér hosi ofisiál sira.

Portavós FRETILIN nian no mós kandidatu parlamentár, Cipriana Pereira
hato'o medida espesífika oioin ne'ebé implementa ka hetan suporte hosi
governu iha tinan lima liu bá atu garante administrasaun ida moos no
onestu ba Timor-Leste oan tomak.

Pereira hatete, "FRETILIN nia pozisaun kona-ba korrupsaun sempre klaru
– toleránsia zero."

Liu hosi debate ida ne'ebé fó-sai diretu hosi televizaun no envolve
partidu hotu-hotu horisehik, nia dehan katak medida sira ne'e sei
inklui estabelesimentu ba Gabinete da Provedoria, Gabinete do
Inspector Geral ho Fundo Petrolífero.

"Governu FRETILIN nian deside mós halo desentralizasaun ba
responsabilidade finansas nian iha faze hirak nia laran, la'ós dala
ida de'it, atu fó tempu hodi harii kapasidade lokál ba jestaun
finansas," Pereira hatete.

"Governu ne'e mós sei kontrata revizór internasionál independente hodi
halo revizaun ba governu nia despeza ho kontas atu reforsa
transparénsia, responsabilidade ho governasaun di'ak.

Pereira sita NGO Timor nian naran LABEH ne'ebé relata katak korrupsaun
iha governu laran ejiste iha eskala ki'ik-oan de'it no la envolve
osan-boot. Korrupsaun ne'e mós limitadu ba alegasaun kona-ba kontratu
sira ne'ebé fó bá-mai la liu hosi prosesu legál ("Corruption Watch
Report 2007" datadu 17 Maiu 2007).

Pereira dehan: "Razaun tansá maka korrupsaun ejiste de'it iha eskala
ki'ik ne'e maka estrutura governasaun di'ak ne'ebé ami implementa.
Ha'u serve iha Parlamentu dezde restaurasaun ba independénsia no ha'u
haree ona transparénsia kona-ba oinsá maka ita nia prosesu revizaun ba
aprovasaun orsamentál ho orsamentu ba despeza hetan inspesaun."

Pereira hatete katak FRETILIN maka propoin atu harii Gabinete Provedor
nian durante asembleia konstituinte iha tinan 2001 bainhira hakerek
Konstituisaun.

"Estabelesimentu ba Gabinete Provedor ne'e sai fatór ida importante
tebetebes atu ajuda ita nia sidadaun sira hato'o keixa kona-ba abuzu
direitus umanus iha instituisaun estadu nian," nia hatete.

"Gabinete ne'e funsiona duni ho independénsia tomak. Iha tinan hirak
nia laran de'it, Gabinete ne'e estabelese duni reputasaun ida ba ninia
kredibilidade ho independénsia hodi investiga keixa oioin."

Kona-ba Gabinete Inspector Geral nian, Pereira dehan katak eis
Primeiru Ministru Mari Alkatiri refere kazu 10 resin ba gabinete
Procurador Geral nian kona-ba alegasaun korrupsaun ne'ebé Inspector
Geral deskobre. Procurador Geral ne'e eis Prezidente maka foti no
ninia gabinete independente hosi governu. Maibé Procurador Geral la
to'o atu foti asaun ne'ebé nesesáriu atu investiga kazu sira ne'ebé
governu refere bá.

Pereira dehan Fundo Petrolífero ho estrutura legál ne'ebé estabelese
ona hetan rekoñesimentu hosi komunidade internasionál hanesan prátika
ida ne'ebé maka di'ak liu hotu-hotu, no mós hanesan meiu ida
transparente atu maneja nasaun ne'e nia reseita petrolífera.

"Governu ne'e mós halo di'ak atu reziste desentralizasaun ba
responsabilidade finansas lalais liu. Ne'e tanba kapasidade atu
administra finansas loloos maka seidauk nato'on iha nivel autoridade
lokál nian."

Atu hetan informasaun liután, favór kontakta ho:
Jose Teixeira (+670) 728 7080 ka fretilin.media@gmail.com
www.fretilin-rdtl.blogspot.com, www.timortruth.com