Komunikadu Imprensa: FRETILIN Ezigi Meza Parlamentu Nasional Fo Sai Kopia Surat Kontratu no CPV Kona Ba Sosa Kareta ba Deputadus

FRENTE REVOLUCIONÁRIA DO TIMOR-LESTE INDEPENDENTE
FRETILIN

KOMUNIKADU BA IMPRENSA
13 Julhu, 2008

FRETILIN Ezigi Meza Parlamentu Nasional Fo Sai Kopia Surat Kontratu no CPV Kona Ba Sosa Kareta ba Deputadus

Vice Chefe Bankada FRETILIN, Francisco Branco ohin ezigi dala ida tan ba meza parlamentu nasional atu fo sai kopia dokumentus kontratu no CPV sosa kareta ba deputadus parlamentu nasional.

“Maske ami nia bankada, no bankada PUN mos ezigi ona dalan rua ba meza parlamentu nasional atu fo sai dokumentus kontratus hirak nee, no CPV, meza seidauk hatan ba ami nia pedidu. Buat nee laos buat susar ida, no mos laos buat segredu ba meza deit ka ministeriu finansas. Ida nee Povu nia osan, no mos osan neebe ami deputadus hotu hotu envolvidu iha laran. La iha razaun ida atu la fo sai dokumentus hirak neebe ami husu,” tenik bRANCO.

Tuir Branco, importanti duni atu hetan dokumentus hirak nee tanba iha polemika barak neebe mosu iha komunidade nia leet kona ba, no manifestasaun mos mosu, kona ba osan hirak mak kareta hirak nee sei kusta ba estadu, no orsamentu mai husi neebe.

“Importanti duni ita deputadus hotu hotu, no sosiedade sivil bele hare ho matan rasik detalhus hirak nee atu bele informa povu tomak. Se lae, ita sei dun malu nafatin no konfusaun sei mosu tanba dadus konkretus la too ba publiku. Tanba nee mak hau dehan, importanti no urgenti duni sira fo sai dokumentus hirak nee.”

“Meza nia falansu atu fo sai kopias dokumentus neebe ami husu, halo ema balun iha komunidade hanoin ona katak parlamentu nasional la iha liu transparensia. Ami mos konkorda no husu meza atu halo mudansa lalais ba lalaok hanesan nee,” Branco hatutan.

Aban, Segunda-Feira loron 14 Julhu, Parlamentu Nasional atu hahu diskusaun kona ba Orsamentu Retifikativu tuir neebe governu de facto AMP nian buka atu amuneta orsamentu geral estadu nian 122%.

“Sira AMP mak defendi liu sosa kareta nee. Maibe ami bankadas neebe kestiona sosa kareta nee labele hetan nem kopias dokumentus kona ba sosa kareta hirak nee no CPV neebe hatama ba Ministeriu Finansas. Nee hatudu dalan ida tan katak regime AMP nee la iha transparensia nem vontade politika atu halau minimu transparenti kona ba orsamentu no gestaun orsamentu, tanba sira labele halo buat ida kiik hanesa loke dokumentus neebe lolos dokumentu publiku, laos segredu.”

“Se ita labele konfia sira atu hatudu transparensia ho buat kiik hanesan nee, oinsa ita bele konfia sira ezekuta orsamentu ida neebe atu aumenta ba 122% bot liu tan ho transparensia. Nee povu nia osan, laos meza nian ka parlamentu nian deit. Tanba nee tenki hatudu momos ba povu nia representanti detalhas tomak kona ba prosesu sosa kareta,” Branco taka.

Kontactus: Jose Teixeira +670 728 7080 Nilva Guimaraes +670 734 0389