Komunikadu Imprensa: ALKATIRI SEI HALAO PROSESU HASORU DIFAMASAUN

FRENTE REVOLUCIONÁRIA DO TIMOR-LESTE INDEPENDENTE

FRETILIN
__________________________________________________________________________

KOMUNIKADU IMPRENSA

Dili, 4 Juñu 2008

ALKATIRI SEI HALAO PROSESU HASORU DIFAMASAUN

Ohin FRETILIN haksolok tamba Tribunal Distrital Amérika nian deside husik no taka asaun legal ne’ebé kompañia minarai Oceanic Exploration foti hasoru kompañia amerika nian ne’ebé manan direitu ba esplorasaun minarai iha Tasi Timor. Oceanic alega katak kompañia ne’e manan kontratu tamba sira fó osan súbar ba politiku no ukun nain sira Timor-Leste nian.

Iha alegasaun ida ne’ebé la iha sentidu, Oceanic Exploration alega mo’os katak eis-Primeiru Ministru no Sekretáriu Jeral FRETILIN, Dr. Mari Alkatiri simu dolar amerikanu tokon rua (US$2.000.000) hodi asina no dudu Tratadu Tasi Timor bele lao ba oin.

Dr. Alkatiri hatete ohin katak nia sei halo tuir asaun legal ne’ebé nia foti tiha ona hasoru politiku sira no media ne’ebé uza lia bosok hosi Oceanic Exploration, durante tinan tolu nia laran, hodi buka halo foer nia naran atu sira bele hetan vantajen polítika.

Prezidente FRETILIN, Francisco Guterres Lu’Olo hateten nia haré katak media lokal no estranjeira sira ne’ebé hori uluk tatoli bei’beik lia bosok hasoru Alkatiri, oras nee nonok hotu kona ba desizaun ne’ebé tribunal distrital Amérika foti tia ona semana nen liubá.

Oceanic hamutuk hó nia subsidiaria sira (hó naran hanesan “Petrotimor” foti asaun hasoru kompañia amerikana Conoco Phillips, nebee oras nee kaer kampu minarai boot liu iha Tasi Timor, dehan katak uluk kompañia Phillips Petroleum (nebee ikus mai fila án bá Conoco Phillips) hetan contrato tamba deit halo korupsaun, foo osan hosi kotuk. Sira alega katak Phillips Petroleum (prekursor ba Conoco Phillips) mak hetan kontratu tamba halo subornu – halo korupsaun ho osan fó hosi kotuk..

Iha loron 16 Abril 2008, juíz Lynn N. Hughes hosi Tribunal Distrital Amerikanu, iha Houston, Texas, taka ona asaun legal ne’ebé Oceanic Exploration no Petrotimor foti hasoru Conoco Phillips, Autoridade Nomeada Tasi Timr (TSDA) no seluk ta’an, iha Marsu 2004. Oceanic husu selu sira dolar amerikanu biliaun 30 (US$ 30.000.000.000) .

Fou’foun kedas Dr. Alkatiri nega makás alegasaun sira ne’e no foti prosesu legal hasoru figura polítika sira ne’ebé halo difamasaun públika bei’beik hodi halo foer nia naran.

Lu’Olo hatete ohin nia sempre fiar katak ema halo alegasaun sira ne’e ho motivasaun polítika no katak tribunal sei hamo’os Dr. Alkatiri nia naran.

Lu’Olo hatete: “ Tamba tribunal taka kazu ne’e , desizaun ida ne’e bolu mo’os atensaun ba polítiku sira hanesan daudaun Prezidente Parlamentu, Fernando Araújo Lasama, ne’ebé halo difamasaun ba Dr. Alkatiri . Sira uza alegasaun sira nee arbiru deit hodi eziji Dr. Alkatiri tuun hosi fatin núdar Primeiru-Ministru. Fernando Araújo Lasama no sira seluk tenke husu ona deskulpa ba Dr. Alkatiri no nia família”.

“ Politika hafoer Dr. Alkatiri no nia familia nia naran hahú ho alegasaun sira ne’e ho objetivu atu obriga nia tuun hosi nia kargu Primeiru-Ministru nian”.

“Dr. Alkatiri nega makás alegasaun ne’ebé ema halo arbiru deit hasoru nia, maibé, embaixador estranjeiru balu mo’os repete duni alegasaun sira ne’e hodi tenta hafoer, iha tempu nebaa Primeiru-Ministru, nia naran no reputasaun. Hau hakarak nia atu hetan justisa. Ema ne’ebé halo kamapaña a’at hasoru nia, tenke hamo’os nia naran.”

Lu’Olo hatete katak súsar uituan iha Timor-Leste atu foti no halao solusaun legal tamba haré bá ninia hahalok, hatudu momós katak Prokurador Jeral ida nee polítiku liu.

“Dr Alkatiri hatama tiha ona keixa ida ba Prokurador Jeral iha Dili hasoru Sr. Fernando de Araújo Lasama, núdar Prezidente Partidu Demokrátiku, partidu opozisaun durante tempu governasaun FRETILIN nian ne’ebé Dr. Alkatiri mak sei kaer hela. Biarbá husu dala barak ona, Prokurador Jeral lakoi halao kazu Dr. Alkatiri aprezenta ne’ebé tuir Kódigu Kriminal Timor-Leste, difamasaun ne’e konsidera núdar ofensa kriminal, ”

“Falha ka neglijensia ka rekuza hosi Prokurador Jeral nee hanesan hó motivasaun polítika, hanesan duni hahalok ninian barbarak ona”.

Kontaktu: José Teixeira +670 723 7080, Nilvia Guimarães +670 734 0389

1