Komunikadu ba Imprensa - FRETILIN FÓ PARABÉNS BA PARTIDU TRABALLISTA NE’EBE MANÁN ELEISOENS BA KAER GOVERNU AUSTRALIA NIAN

FRENTE REVOLUCIONÁRIA DO TIMOR-LESTE INDEPENDENTE
FRETILIN

------------------------------------------------------------------------------------------------------------------------------------------
KOMUNIKADU BA IMPRENSA
25 Novembru 2007

FRETILIN FÓ PARABÉNS BA PARTIDU TRABALLISTA NE’EBE MANÁN ELEISOENS BA KAER GOVERNU AUSTRALIA NIAN

FRETILIN fó parabéns ba Primeiru –Ministru foun Austrália nian, Sr. Kevin Rudd no nia bankada parlamentar tamba manan eleisoens ba kaer governu iha eleisoens jerais halao horseik iha Austrália, dehan Dr. Mari Alkatiri, Sekretáriu-Jeral FRETILIN nian no núdar ex-Primeiru-Ministru RDTL nian.

“Ami koñese kleur ona Kevin Rudd. Nia belun Timor-Leste nian kleur ona molok referendu 1999. Ami haklaken tebes katak povu Australianu hili nia no ninia partidu núdar matadalan sosiedade nian ne’ebé sei lao ba oin ho laran luak no respeitu liu no hateke ba futuru”, Alkatiri hatete.

Ïha Setembru 2001, Kevin Rudd, núdar membru sénior Partidu Traballista Austrália nian, oferese a’an ba ajuda FRETILIN sai membru asosiasaun partidus polítikus progressistas hosi rai oi’oin, naran INTERNASIONAL SOSIALISTA, asosiasaun ida ne’ebé Partidu Traballista Austrália halo parte kleur ona no sai mo’os mata dalan. Tamba ida ne’e FRETILIN sai partidu irmaun Partidu Traballista nian. Ami laran haksolok tebes tamba haré partidu ne’ebé halo parte família INTERNASIONAL SOSIALISTA hetan konfiansa hosi povu atu kaer governu; ami kontente tamba povu fiar partidu ne’e atu hametin demokrasia no justisa sosial – ideal ne’ebé ami, núdar sosialistas internasionais, haksolok no hakarak halao,” hatutan Dr. Alkatiri.

“Austrália ho Timor-Leste iha ligasaun istórika liu ona tinan atus ha’at liu mo’os hosi Segunda Guerra Mundial. FRETILIN no membru barak hosi Partidu Traballista Austrália iha relasaun istórika diak tebes ne’ebé hametin liu ta’an durante tinan 24 luta libertasaun Timor-Leste nian. Ami fó laran tomak ba halao nafatin relasaun ida ne’e no halao relasaun ne’e ba oin ho respeitu ba malu, haré malu núdar maun alin ne’ebé buka hamutuk benefísius ekónómikus ne’ebé bele hetan ohin no aban bai rua tamba haktuir politika dezenvolvimentu ida ké sei la estraga meiu-ambiente”, hatutan Dr. Alkatiri.

Dr. Alkatiri hatete katak núdar partidu politiku bo’ot liu iha Timor-Leste, FRETILIN hakarak koalia lalais ho governu foun Austrália nian, ne’ebé partidu traballista kaer ohin loron, atu haré oinsá Austrália bele halao diak liu ta’an sira nia knaar atu ajuda hametin seguransa no situasaun polítika iha Timor-Leste.

“Ami hakarak halo diálogu ke diak no halao relasaun ho respeitu ba malu, hodi se’es hosi problemas ne’ebé haketak ita ho sira, hodi nuné bele hametin relasaun diak ba aban bai rua entre partidu FRETILIN no Partidu Traballista no entre Austrália no Timor-Leste, hatutan Dr. Alkatiri.

Hakarak hetan ta’an informasaun, bele dere arame ba José Teixeira, tel. 728 7080, e-mail: fretilin.media@gmail.com