Deklarasaun Bancada Parlamentar Fretilin - Kona ba Aprovasaun OGE ba periodo 01 Julho – 31 Dezembro '07

Povo Timor – Leste tomak

Hafoin debate especialidade no votasaun hirak nebe ita hotu asiste iha
Parlamento Nacional ida ne'e, ami Bancada Parlamentar Fretilin
continua preokupa ho OGE periodo 01 de Julho ate 31 de Dezembro 2007
nebe deputados hotu atu halo ona votasaun final e global. Ba dala
uluk hau hakarak fo hanoin hikas ba ema hotu, katak declaracao
politica nebe Bancada Fretilin hato'o tiha ona horseik antes hakotu
debate generalidade, continua valida no mantem nafatin, exepto
declaracao kona ba veteranos, no seluk tan kona ba ilegalidade
Secretariado Estado Regiao Autonoma de Oecusse nian.

Preocupasaun bot ida, mak konaba fundo ba task force luta contra
probreza iha orcamento Presidencia da Republica, fundo ida nebe laiha
esplikasaun ka justifikasaun. Ita hotu lahatene osan ida ne'e atu
uza ba saida. Karik atu fahe osan ba ema kiak sira, nune'e bele
combate ona pobreza? Ka kria tan fali dependencia ke halo ema nunca
mais atu sai husi kiak? Karik atu halao Presidencia Aberta durante
fulan rua oin mai ?

Em termos de competencia, luta contra pobreza kompete ba governo liu
hosi nia programa desevolvimento. Maske politikamente, Presidente da
Republica iha responsabilidade atu envolve'an iha asunto ida ne'e,
maibe tanba laiha justifikasaun, ita bele dehan katak, ida ne'e
hamosu duni saku azul para sira bele gasta osan conforme idak-idak
nia hakarak. Nune'e ita hamosu presedente nebe ladiak ba ita nia
prinsipio transparencia no akuntabilidade.

Ita triste tebes bainhira parlamento nasional halo aprovasaun hodi
autoriza governo atu halo levantamento osan fundo minarai nian $40
milhoes, la tuir procedimentus nebe lei fundo petróleo nian haruka.
Hirak ne'e hotu hamosu presdente a'at ba Timor Leste nebe hahi'i
prinsipio fundamental ba transparência no akuntabilidade. Ne'e hatudu
mos katak kontra fali intensaun politika atu halo"reforma ka mudanca"
nebe governo de fakto halo bebeik ona kampanya.

Ita hotu reconhece katak deslokados sai hanesan problema ida ke
urgente no importante tetebes. Uluk, partidos sira nebe ohin loron
hetan fatin iha Parlamento ne'e, hotu-hotu halo promesa atu resolve
problema deslokados iha curto prazo, hanoin bele halo milagre. Agora
sira dehan ita tenke realista, hodi fo osan ba deslokados $2 milhoes
deit atu hola tan tenda ho seluk-seluk tan. Nune'e ema tenke hela
nafatin iha tenda okos, maske ema barak kleur ona terus iha tenda
okos. Ho maioria parlamentar nebe sira iha, Sira rejeita atu aumenta
osan atu resolve problema ne'e urgentemente. Iha parte ida sira dehan
laiha kapasidade atu executa osan barak iha tempo badak, maibe iha
parte seluk fali osan atu gasta ba bens e servisus, nebe bot tetebes
maske laiha plano atu uja, ba ida ne'e sira dehan bele executa. Hosi
ne'e, hatudo ona katak sira laiha honestidade, laiha konsiensia
moral, lakon ona nia sensibilidade ba povo sira nebe terus hela. Sira
laiha seriedade atu fo importancia ba assunto deslokados.

Tanba preocupacao hirak ne'e hotu, ami Bancada Fretilin kontra lei
orcamento geral do estado ida ne'e.

Ikus, preocupacao bot liu maka oin sa executa orcamento ida ne'e iha
tempo badak ho osan nebe bot demais, ultrapasa kibit governo nian,
mesmo ke atu halo deit despeza. Bancada Fretilin duvida kapasidade
governo nian atu executa. Maske Governo de facto hateten katak bele
executa hotu, tanba ne'e lakohi koa osan ba bens e servisus, ami hein
katak sei laiha tan carried over hanesan diabo Governo Fretilin nian
uluk. Se lae, kala ita sai diabo hotu, nune'e hatudu ona incapacidade
Governo de facto nian atu ukun, ke, hanesan SE Sr Kayrala Xanana
Gusmao hateten tiha ona katak: se mak naok kwarter ida, sai ! Se mak
lahatene servisu, sai! Se mak la hatene ukun, sai!!! Bancada Fretilin
hein Governo de facto cumpre nia promesa hirak ne'e, iha Janeiro tinan
2008.

Mak ne'e deit, obrigado

Deputado Aniceto Guiterres, Chefe Bankada FRETILIN