KOMUNIKADU BA IMPRENSA - FRETILIN HATUDU ANICETO GUTERRES LOPES NU’UDAR PREZIDENTE PARLAMENTU NASIONAL

 

FRENTE REVOLUCIONÁRIA DO TIMOR-LESTE INDEPENDENTE

FRETILÍN

 

Rua dos Mártires da Pátria, Comoro, Dili, Timor-Leste, e-mail fretilin@gmail.com

 

 

FRETILIN HATUDU ANICETO GUTERRES LOPES NU'UDAR PREZIDENTE PARLAMENTU NASIONAL

 

KOMUNIKADU BA IMPRENSA

 

Sábadu, 29 Jullu 2007

 

 

Komisaun Politika Nasional, nu'udar órgaun politiku-exekutivu Comité Central FRETILIN nian, hala'o reuniaun ida iha Dili ohin, hasai desizaun ho unanimidade hatudu ba Kargu Prezidente Parlamentu Nasional, deputadu eleitu husi FRETILIN, jurista ida naran Aniceto Guterres Lopes, hare tuir ba ninia envolvimento iha luta ba libertasaun nasional no nia hamrik metin hodi defende maka'as direitu umanu no mos ninia kualidades ba prinsípios nebé mos, integridade no kbiit lideransa.

 

Aniceto Guterres hanesan membro Conselho de Estado hahú husi 2005, nu'udar Prezidente Comissão ba Acolhimento , Verdade no Reconciliação ( CAVR ) husi 2002 -2005 no co-fundador ho director ONG Yayasan HAK(2002-2003). Husi 2000 to'o 2001, hanesan membro ba Conselho Nasional , orgaun konsultivu UNTAET nian. Hari iha 2000, Associação dos Juristas de Timor-Leste. Iha 1992 to'o 1996, nu'udar Sekretáriu ETADEP nian, organizasaun não governamental ( ONG ) ida nebé hak'nar ân ba dezenvolvimentu komunitáriu iha Timor-Leste.

 

Nu'udar membru ativu RENETIL nian, organizasaun estudantil ida nebé apoia Rezistênsia durante períodu okupasaun indonésia nian.

 

Iha 2003, hetan kondekorasaun husi Presidente Filipinas nian ho prémiu naran Maqsaysay nebé fó ba líderes emergentes sira.

 

Hanesan rekoñesimentu ba kualidade no dedikasaun ba partidu, hili iha Kongresu partidu FRETILIN nian , nebé hala'o iha Maio de 2006, nu'udar membru Komisaun Nasional Jurisdisaun nian.

 

Iha reuniaun Komisaun Polítika Nasional FRETILIN nian, diskute mos kestaun kona ba formasaun IV Governo Constitucional, nune'e hamatan tuir dalan Konstituisaun nian, katak Prezidente Repúblika sei bolu mos FRETILIN nu'udar partidu nebé hetan votu barak liu iha eleisoins nebé hala'o iha loron 30 fulan Juño tinan 2007.

 

Nune'e, hatalik ba kestaun formasaun governu nian, Sekretáriu Geral FRETILIN nian , Dr. Mari Alkatiri, hameti lia dala ida tan hamutuk ho CPN katak nia sei la kandidata ân ba kargo Primeiru-Mnistru RDTL nian , nune'e husu atu orgaun ne'e hatudu kandidatu seluk, wainhira FRETILIN simu konvite husi Presidente Repúblika.

 

Hola fatin mos iha reuniaun ne'e deputados eleitus husi FRETILIN.

 

 

Atu hetan tan informasaun , dere arrame mai:

- Arsénio Bano , Vice-Presidente FRETILIN, membro da CPN no deputadu eleitu, tel. 7339416

- José Teixeira, deputado eleitu, tel. 728 7080