Komunikadu Imprensa - Planu partidu opozisaun nian kona-ba polítika desentralizasaun atu

Vota ba FRETILIN!
Eleisaun Parlamentár 2007

"Defende indpendensia Timor-Leste nian"

Komunikadu de Imprensa
18 Juñu 2007

Planu partidu opozisaun nian kona-ba polítika desentralizasaun atu
hamosu de'it desperdísiu ho korrupsaun

Polítika desentralizasaun ba governeno ne'ebé partidu opozisaun sira
propoin sei hamosu de'it desperdísiu (gasta arbiru de'it),
inefisiénsia ho korrupsaun, FRETILIN, partidu boot liu iha Timor-Leste
dehan ohin.

Ministra ba Administrasaun Estatál no mós kandidatu Fretilin nian ba
parlamentu, Ana Pessoa, dehan partidu opozisaun nia polítika hatudu
katak sira ladún kompriende kestaun institusionais kompleksu sira
ne'ebé envolve bainhira ita fó filafali podér ho responsabilidade
finansas nian ba governu lokál.

"Atu desentraliza podér, primeiru ita tenke garante katak governu
lokál sira ne'e iha instituisaun adekuada no mós ema ho kapasidade
téknika loloos. Buat sira ne'e tenke iha fatin loloos hodi evita
desperdísiu (gasta arbiru de'it), inefisiénsia ho korrupsaun," Ana
Pessoa dehan.

Nia dehan katak governu FRETILIN kompleta tiha ona estudu ida ne'ebé
lori tinan tolu atu halo kona-ba opsaun desentralizasaun nian. Tuir
rezultadu ne'ebé estudu ne'e hetan, governu FRETILIN iha planu atu
harii munisipalidade hanesan baze ba reforma governu lokál.

Ami nia estudu kona-ba desentralizasaun konklui depois de konsulta
jerál ida iha komunidade lokál, inkluindu xefe-suku sira, konsellu de
suku ho funsionáriu sivíl sira," nia dehan.

"Depois de ami halo fali revizaun ba estudu ne'e, governu FRETILIN
deside atu hala'o programa pilotu iha distriu haat: Bobonaro, Lautem,
Aileu ho Manatuto.

"Ita sei aprende ho lisaun prátika kona-ba desentralizasaun liu hosi
programa pilotu sira ne'e. Depois maka ita bele kontinua hodi
estabelese munisipalidade seluk iha Timor-Leste laran. Munisipalidade
ida-idak ho ninia kapitál rasik hanesan sentru administrativu.
Objetivu maka atu kria munisipalidade entre 30 to'o 35 iha rai-laran
tomak até tinan 2015."

Ana Pessoa, ne'ebé uluk servisu hanesan juiza iha Mosambike no iha
esperiénsia hanesan jurista kódigu sivíl nian, aumenta tan katak
governu FRETILIN komesa tiha ona fó filafali responsabilidade sira
ne'e uitoan-uitoan. Nia ko'alia kona-ba Fundo de Desenvolvimento
Comunitário ne'ebé Ministru Agrikultura nian lansa iha fulan Maiu
tinan ne'e. Tuir programa ida ne'e Timor-Leste nia suku 442 ne'e
ida-ida sei simu US$10.000 hosi governu atu gasta ba projetu
komunidade nian. Nia dehan komunidade lokál sira ne'e kaer mós
responsabilidade ba projetu ki'ik-oan sira seluk iha bee ho
eletrisidade nian iha rai-laran.

Ana Pessoa dehan, "fó filafali podér loloos ba governu lokál ne'e
hanesan esperiénsia foun ida ba ita nia povu. Desentralizasaun
tenkesér tama iha faze por faze iha tinan hirak mai ne'e nune'e hodi
bele minimiza erru (kesalahan) no mós lori benefísiu loloos ba iha
komunidade iha baze."

Atu hetan tan informasaun, favór kontakta ho: Ana Pessoa (+670) 723 0014