Komunikadu Imprensa - Mari Alkatiri simu kondekorasaun a'as Timor-Leste

FRENTE REVOLUCIONÁRIA DO TIMOR-LESTE INDEPENDENTE

FRETILIN

23 Maio 2007
Komunikadu Imprensa

Mari Alkatiri simu kondekorasaun a'as Timor-Leste

Dr.  Mari Alkatiri, Sekretariu Jeral FRETILIN, simu kondekorasaun
a'as, Medallia Dom Boaventura Timor-Leste, hanesan rekoñesimentu ba
nia kontribuisaun a'as durante tempu Resistensia to'o independensia.

Medalia ne'e hanesan honra ba Dr. Alkatiri nia papel nudar fundador ba
movimentu libertasaun – ne'ebé transforma ba partidu politik FRETILIN,
no mos ba nia papel iha frente diplomatiku husi tinan 1975 to'o 1979.

Medalia Boaventura ne'e marka kondekorasaun a'as iha Timor-Leste.

Kondekorasaun ne'e  fo'o husi Prezidente  Kay Rala Xanana Gusmão husi
seremonia ne'ebe hala'o iha Palasio Prezidential iha Dili, loron 19
Maio.
Seremonia ne'e partisipa mos husi membru governu no membru parlementu,
reprezentante husi partidu politiku no mos husi orgauns reliziosu.

"Hau sempre luta no hala'o hau nia kna'ar ba Timor-Leste, hau nia
nasaun, no hau sei kontinua nafatin," Dr Alkatiri hato'o ba jornalista
sira wainhira seremonia kondekorasaun ne'e hotu.

Iha seremonia ne'e mos, fo medalia Dom Boaventura  ba saudozu Nicolau
Lobatu, lideransa FRETILIN ne'ebé military indonesio o'ho iha funu
tinan foun iha 1978 no mos ba prezidente eleitu foun José Ramos Horta.

Membrus FRETILIN seluk mos simu ona kondekorasaun medalia Dom
Boaventura ba sira nia kontribusaun a'as durante  luta ba
independensia husi tinan 1975 to'o 1979 iha seremonia ne'ebe halao
tiha ona.

Dr. Alkatiri  fundador  ba Asosiasaun Sosial Demokratiku Timorense
(ASDT) ne'ebe hari'i Iha loron 20 Maio 1975, no ikus transforma ba
FRETILIN. Nia mos hola parte iha deklarasaun unilateral ba
independensia iha loron 28 Novembru 1975 no hanesan Ministru Senior ba
Asuntu Politiku iha premeiro Guvernu Timor- Leste iha 1975.

Comite Central FRETILIN deside haruka Alkatiri, Ramos Horta no Rogerio
Lobato ba tasi balun hodi establese frente diplomatiku wainhira hatene
katak Indonesia atu halo invazaun iha Timor-Leste.  Dr. Alkatiri mak
xefi ba frente diplomatiko husik Timor Leste iha loron 4  Dezembru
1975.

"Hau lakohi atu husik Timor-Leste wainhira Indonesia halo invazaun,
maibe hau tenki tuir desizaun Comite Central FRETILIN no hau hetan
ordem espesial husi Vice Prezidente Nicolau Lobato," katak Dr
Alkatiri.

Dr Alkatiri eleitu hanesan Vice Prezidente FRETILIN iha konferensia
FRETILIN ne'ebé hala'o iha Sydney iha tinan 1998.

Nia fila mai Timor-Leste, iha Setembru 1999 wainhira referendum remata
no hala'o nia kna'ar hodi restrutura FRETILIN no habelar membru
partidu hodi serve ba nasaun foun Timor-Leste.

Iha tinan 2001, Dr Alkatiri eleitu hanesan Sekretariu Jeral FRETILIN
iha Kongresu Nasional FRETILIN ba dala uluk no re-elitu ba pozisaun
ne'ebe hanesan iha Kongresu Nasional FRETILIN ba dala rua iha tinan
2006.

Nia hola parte iha Governu Tranzitoriu ONU no hala'o kna'ar hanesan
Xefi ba asuntu Ekonomia no iha segundu governu tranzitoriu ONU, Dr.
Alkatiri hala'o nia kna'ar hanesan Xefi Ministru. Iha Fulan Maio 2002,
FRETILIN hanesan partidu politu ho maioria absolute iha Parmalentu,
nomeia Dr. Alkatiri ba Primeiro Ministru iha Premeiru Governu
Konstitusional. Dr Alkatiri hala'o nia kna'ar hanesan Primeiro
Ministru iha 20 Maio 2002, loron restorasaun independensia
Timor-Leste.

Durante tinan ha'at governu ne'ebe lidera husi  Dr. Alkatiri atinzi
buat barak ne'ebe hetan komentariu diak husi komentator lokal no mos
internasional inklui nia suksesu halo negosiasaun Petrolium-Tasi Timor
ho Australia, establese Fundu Petrolium no halakon kaisa eskolar no
aksesu gratuitu ba tratamentu saude.

Iha loron 26 Juňu  2006, Dr.Alkatiri rezigna  husi nia kargo hanesan
Premeiru Ministru haktuir grupus anti governu no anti-FRETILIN ne'ebe
halo asaun destabilidade hasoru governu  eleitu demokratiku no hakarak
halo mudansa ba governu.

Hakarak hatene ta'an informasaun, bele dere arame ba:
Jose Teixeira (+670) 728 7080 (Dili, Timor-Leste)