Komunikadu Imprensa - FRETILIN hatún programa ba kampaña eleitorál

Vota ba FRETILIN! Eleisaun lejislativa 2007 “Husi Povu, ho povu, ba povu” Komunikadu imprensa

29 Maiu 2007

FRETILIN hatún programa ba kampaña eleitorál

Portavóz no kandidatu eleisaun parlamentar FRETILIN nian, José Texeira anunsia FRETILIN nia tema 15 kampaña nian ba eleisaun parlamentár tinan 2007 ne’ebé sei hala’o iha loron 30 fulan Juñu tinan 2007.

“Tuir FRETILIN, manán ka lakon iha eleisaun ne’e, sei depende ba programa sira ne’e. Ami sei sai governu ida inkluzivu nafatin ne’ebé sei rona opiniaun oioin hosi sosiedade sivíl, Igreja no mós povu tomak.”

Tema 15 ba kampaña ne’e maka:

1. Sé maka sei proteje Timor-Leste nia soberania ho independénsia polítika iha mundu globalizadu ho kompetitivu ida ne’e?

2. Sé maka sei iha liu kapasidade atu estabelese no konsolida estadu demokrátiku bazeadu ba justisa ho lei?

3. Sé maka sei luta ba demokrasia ida ne’ebé direitus humanus, liuliu direitu feto nian, sei hetan protesaun no mós respeitu?

4. Sé maka sei fó edukasaun bázika gratis (la selu osan ida) ho servisu saúde gratis ba povu Timor-Leste tomak?

5. Sé maka sei dezenvolve infraestrutura telekomunikasaun ho televizaun nian ne’ebé rai tomak presiza?

6. Sé maka sei garante atu rejiaun rurál ho aldeia sira hetan asesu ba servisu báziku sira?

7. Sé maka sei hato’o bee-moos ho eletrisidade ba uma-kain sira hotu?

8. Sé maka sei hamoos tiha analfabetizmu (la hatene lee ho hakerek) ho kiak (pobreza)?

9. Sé maka sei hadi’a kualidade edukasaun ho saúde nian?

10. Sé maka bele garante páz, estabilidade ho soberania nasionál?

11. Sé maka sei hadi’a kondisaun ba ita nia estrada sira ho komunikasaun?

12. Sé maka sei fó treinu ho kualifikasaun profesionál ba Timór-oan TOMAK?

13. Sé maka sei investe iha setór públiku ho privadu atu kria servisu ba joven sira?

14. Sé maka sei harii uma ba família hotu-hotu?

15. Sé maka sei promove ita nia joven sira nia kreatividade ho enerjia?

“Mai ita halo eleisaun ida ne’e livre hosi violénsia ho intimidasaun. Ita hotu-hotu iha responsabilidade atu bá vota. Vota hotu-hotu tenke sura.”

“Viva Timor-Leste!”

Atu hetan tan informasaun, favór kontakta Jose Teixeira (+670) 728 7080 se lae bele haruka email ba fretilin.media@gmail.com