Vota ba FRETILIN! “Defende Timor-Leste ninia independénsia”
|
7 Juñu 2007
FRETILIN halo diálogu ho povu iha primeira semana kampaña nian
FRETILIN, partidu polítiku boot liu iha Timor-Leste, halo diálogu iha distritu Viqueque, Lautem, Baucau ho Manatuto iha primeira semana kampaña nian ba eleisaun parlamentár iha loron 30 fulan Juñu.
Prezidente FRETILIN, Francisco “Lu Olo” Guterres dehan “enkontru ho diálogu sira ne’e lidera hosi ha’u an rasik ho Sekretáriu Jerál partidu nian, Mari Alkatiri.
“Ami hetan mós tulun hosi Ministru ba Agrikultura, Francisco Benevides, Vise-Ministra ba Edukasaun Ilda Maria da Conceição no mós Ministra ba Obras Públikas Odete Victor.”
Lu Olo dehan “enkontru sira ne’e envolve diálogu oioin entre lideransa partidu nian ho apoiante ho membru sira. Membru ho apoiante sira hetan brani atu husu pergunta kona-ba governu nia programa iha tinan lima nia laran no ami nia fokus ba tinan 5 oin mai karik FRETILIN fila fail ba kaer governu.
“Lideransa nia papél durante diálogu ne’e maka atu fó resposta klaru ba pergunta sira ne’e no reforsa talentu membru lista FRETILIN nia ba parlamentu.”
Lu Olo kontinua: “ami mós reforsa katak governu FRETILIN maka konsege harii no estabelese instituisaun governu nian no dezenvolve programa polítika, ekonómika, social no kulturál ba nasaun ne’e.”
“Tinan lima oin mai governu sei tau-matan ba edukasaun, saúde, infraestrutura ho agrikultura. Kona-ba Timor-Leste nia infraestrutura, Governu FRETILIN sei tau-matan ba transporte ho komunikasaun, eletrisidade ho bee.”
Lu Olo dehan, “ami mós kaer ami nia mensajen pozitivu no ko’alia kona-ba ami nia programa.
“Ami sei evita liafuan konfrontasionál kontra partidu opozisaun sira no mantén nafatin ami nia krítika ba partidu opozisaun sira nia programa.
“Medida ida ne’e ami hala’o tuir kódigu de konduta eleisaun nian ne’ebé reprezentante partidu polítiku nian hotu-hotu maka asina. Iha akordu ne’e partidu ida-idak konkorda atu promove kampaña ida moos ne’ebé la involve atake pesoál, violénsia ka insultus.”
Lu Olo dehan, “FRETILIN só halo promesa ne’ebé nia bele kumpre. FRETILIN só halo promesas ne’ebé isin. Ami lakohi fó esperansa falsu ba povu Timor-Leste.”
Dr. Mari Alkatiri dehan “bainhira ha’u kaer kargu hanesan lider ba primeiru governu konstitusionál, ha’u hatene katak durante tinan 5 primeiru ne’e sei sai difisil. Maibé ha’u la lamenta desizaun ida ne’e.”
“Molok diálogu sira ne’e hotu ha’u sempre realsa kona-ba tansá maka importante ba FRETILIN atu manán eleisaun parlamentár ne’e nune’e para iha kontrabalansu ida ba Prezidente da Repúblika tanba nia sai ona hanesan reprezentante partidu opozisaun nian.
“Prezidente ne’e halo ninia kampaña bazea ba nia an hanesan figura independente ida. Maibé atu hetan apoiu hosi partidu opozisaun sira hotu nia halo promesa barak ne’ebé nia sei susar atu kumpre. Promesa sira ne’ebé nia halo tiha ona signifika katak nia sai ona hanesan figura komprometidu ida.
Se partidu opozisaun nian maka forma governu, Prezidente ne’e nia pozisaun sei sai komprometidu liu tan.
Atu hetan tan informasaun, favór kontakta ho FRETILIN media ho fretilin.media@gmail.com
Sem comentários:
Enviar um comentário