Komunikadu Imprensa - FRETILIN apresenta Programa Bolsa Estudu atu haburas feto nia direitu

Vota ba FRETILIN!
Eleisaun Parlamentar 2007

"Defende independensia Timor-Leste nian"

Komunikadu inprensa
12 Junhu 2007

FRETILIN apresenta Programa Bolsa Estudu atu haburas feto nia direitu

Governu FRETILIN sei fo bolsa estudu atu fo aten bot ba feto sira atu
bele kompleta sira nia eskola primaria, sekundaria no universitariu
atu nune bele hasae feto sira nia status.

Atu hahu, programa ne sei fo bolsa lubun bot ida (liu atus ida) ba
distritu idak-idak iha distritu 13 nia laran, hahu hosi tinan oin.

Sekretariu Geral FRETILIN nian, Dr. Mari Alkatiri haton katak, se
karik iha tinan lima tuir mai ne FRETILIN maka sei kaer nafatin
Governu, FRETILIN sei garante katak feto sira sei hetan oportunidade
atu bele ba eskola no universidade.

Kompromisu atu fo bolsa estudu ne hato iha dialogo horas nen nebe
FRETILIN halao ho representantes Partidu nian iha Dili no areas
sirkundantes.

Dr. Alkatiri hatutan tan katak numero ema nebe simu bolsa sei aumenta
tinan-tinan, tuir lukru nebe ita sei hetan hosi ita nia mina rai.

Ne hanesan dalan ida nebe ke ita bele halao, sustentavel non efektivu
atu bele hadiak retensaun, liu-liu iha eskola primaria to universidade
atu garante katak feto sira kompleta sira nia eskola to iha nivel
universidade nian.

Tamba razoens kulturais no finanseirus nebe ladun favorese ba feto
sira atu bele kompleta estudu iha universidade, horas ne daudauk
oportunidade ba labarik mane sira quase barak liu duke feto sira atu
bele estuda iha eskola sekundariou no nivel nebe as liu taan.

Ita labele esklui 50% hosi ita nia populasaun atu partisipa iha
desenvolvimentu sosial, politiku no ekonomiku ita nia rai nian. Buat
ne maka ita halo wainhira ita la buka atu halakon buat hirak nebe
satan netik dalan ba ita nia feto sira atu bele hatudu sira nia
kapasidade nebe bot tebes.

FRETILIN desde uluk kedas maka buka haburas direitus feto nian no
igualdade do generu. Bolsa ne hanesan prova ida taan hosi ami nia
kompromisu ba igualdade de direitu ba feto sira.

Atu hetan Informasaun bele kontaktu:
Jose Teixeira (+670) 728 7080 (Dili) ou haruka email ba:
fretilin.media@gmail.com